Chelsea reynslunni ríkari

Eiður Smári Guðjohnsen segir í viðtali við enska blaðið The Sun í morgun að Chelsea hafi lært sína lexíu í undanúrslitum Meistaradeildarinnar fyrir ári síðan þegar Mónakó sló Chelsea út. Hann segist ekki vilja upplifa þau vonbrigði aftur. Allir vinni nú að sameiginlegu markmiði og ekki sé verið að hræra með leikkerfi eða leikmenn fram og til baka líkt og á síðustu leiktíð, undir stjórn Claudio Ranieris. Chelsea og Liverpool hafa mæst þrívegis á leiktíðinni, tvívegis í deildinni og í úrslitum deildarbikarsins, og Chelsea haft betur í öll skiptin.