Cisse varð fyrir kynþáttafordómum

Knattspyrnusamband Evrópu hefur gefið til kynna að það hyggist grípa til aðgerða vegna kynþáttafordóma í garð sóknarmannsins Djibril Cisse í leiknum gegn CSKA Sofia í gær. Leikurinn fór fram í Sofiu en þetta var fyrri viðureign liðanna í undankeppni Meistaradeildar Evrópu. Cisse skoraði eitt marka Liverpool í 3-1 sigri en hluti stuðningsmanna heimaliðsins gáfu frá sér apahljóð þegar Cisse var með knöttinn. Rafael Benitez, knattspyrnustjóri Liverpool, sagði eftir leikinn að eftirlitsmaður UEFA hefði heyrt í stuðningsmönnunum og ætti skýrsla að berast í höfuðstöðvar sambandsins í dag.