Sætt að sigra gegn gömlu félögunum

Giovanni van Bronchorst, leikmaður Barcelona og fyrrum leikmaður Arsenal, sagði það hafa verið sætt að leggja gömlu félagana í úrslitaleiknum í meistaradeildinni í kvöld.

"Við lögðum hart að okkur í allan vetur til að ná í úrslitaleikinn og það var því frábært að ná að sigra - maður fær ekki mörg tækifæri til þess á ferlinum. Við vorum heppnir að Thierry Henry náði ekki að skora, en í stað þess skorum við tvö mörk. Þetta var stórkostleg tilfinning og þó það hefði verið dálítið skrítið að vinna gamla liðið sitt, get ég ekki neitað því að það var nokkuð sætt."