United er ekki endilega sigurstranglegra

Thierry Henry hjá Barcelona segir að þó Manchester United sé vissulega að leika vel þessa dagana, geti liðið ekki endilega talist sigurstranglegra þegar það mætir Barcelona í undanúrslitum keppninnar í lok mánaðarins.

"Þetta verður mjög spennandi leikur en við verðum líka að spila vel því við erum að fara að mæta liði sem er að spila ótrúlega vel núna. Fólk mun segja að þeir séu sigurstranglegri, en maður veit aldrei," sagði Henry.

Frakkinn er þaulvanur að spila á móti United eftir að hafa leikið á Englandi um árabil.

"United er á toppnum á Englandi og menn eins og Ronaldo eru að spila mjög vel. En við þekkjum þá vel svo það mun ekkert koma okkur á óvart í leik þeirra," sagði Henry.