Ray Allen fer í stjörnuleikinn - Kobe tæpur

Skotbakvörðurinn Ray Allen frá Boston Celtics fær að taka þátt í stjörnuleiknum í NBA um næstu helgi eftir að ljóst varð að Caron Butler frá Washington gæti ekki tekið þátt í leiknum vegna meiðsla.

Þetta þýðir að Boston verður með tvo fulltrúa í leiknum þrátt fyrir allt, en áður hafði Kevin Garnett þurft að afboða komu sína þangað vegna meiðsla. Rasheed Wallace frá Detroit kom inn í byrjunarlið Austurdeildarinnar í stað hans.

Óvíst er hvort Kobe Bryant frá LA Lakers getur tekið þátt í leiknum fyrir Vesturdeildina, en hann hefur átt við meiðsli á fingri að stríða síðustu daga. Bryant átti líka að taka þátt í þriggja stiga skotkeppninni á laugardaginn.