Sparifjáreigendur Kaupþings í Bretlandi enn í biðstöðu

Yfir 6.000 manns sem áttu fé inni á reikningum hjá Singer & Friedlander, banka Kaupþings í Bretlandi, hafa enn ekki fengið innistæður sínar greiddar. Upphaflega lofaði bankatryggingarsjóður landsins (FSCS) að borga féið út fyrir jólin í fyrra.

Í frétt um málið í blaðinu Daily Telegraph segir að 1.000 viðskiptavinir hafi fengið sitt fé nú þegar og reiknað er með að aðrir 1.000 fái borgað í þessari viku.

Talsmaður FSCS segir að hinar miklu tafir á útborgun af reikningum í Singer & Friedlander sé vegna tölvukerfisins sem Kaupþing notaði.

Sökum þessa þarf starfsfólk FSCS að fara yfir öll reikningsnúmerin sem um ræðir samkvæmt lista frá skiptastjórunum Ernst & Young. Þetta er til að tryggja að réttir aðilar fái borgaðar réttar upphæðir.

Þeir viðskiptavinir Singer & Friedlander sem Telegraph ræddi við kvarta undan því að þeir fái ekki neinar upplýsingar frá FSCS um afhverju þessi mikla töf er á afgreiðslu mála þeirra.