Kobe þarf að skora 38 stig í nótt til að verða stigakóngur

Það er nokkuð undir hjá Kobe Bryant í kvöld en hann getur orðið stigakóngur NBA-deildarinnar nái hann að skora 38 stig gegn Sacramento í nótt.

Kobe er með 27,9 stig að meðaltali í leik en Durant er efstur með 28 stig að meðaltali. Durant hefur lokið keppni og Kobe fær því tækifæri til þess að hrifsa af honum stigatitilinn.

Kobe ætti vel að geta náð því en hvort hann sé til í að leggja mikið á sig til þess er annað mál. Úrslitakeppnin er handan við hornið og Kobe gæti því hvílt nokkuð.

Durant hefur verið stigahæsti leikmaður deildarinnar síðustu tvö ár og hann segir það ekki skipta sig miklu máli missi hann titilinn til Kobe. Hann ætlar ekki einu sinni að horfa á leikinn í nótt.

LeBron James er þriðji stigahæstur en hann þyrfti að skora 83 stig í nótt til þess að ná stigatitlinum að þessu sinni.