Lágstemmd og leyndardómsfull

Sigur Rós fær þrjár stjörnur af fimm mögulegum í breska tónlistartímaritinu Q fyrir plötuna Valtara.

Þar segir að tónlistin hafi yfir sér leyndardómsfullan blæ og líkir henni við Riceboy Sleeps, plötuna sem söngvarinn Jónsi og Alex Somers sendu frá sér fyrir þremur árum. Valtari sé lágstemmdari en flest annað sem Sigur Rós hafi gert og söngur Jónsa hreinlega hverfi í fimmta laginu af átta og hljómi eftir það ekki meir á plötunni.

„Hin rólega uppbygging laganna krefst þess að þú leggir vel við hlustir og þeir verðlauna þá þolinmæði með ambient-tónum, stuttri útgáfu af fegurð,“ segir í dómnum. „Eftir smá stund ferðu á uppreisnarkenndan hátt að velta fyrir þér hvað myndi gerast ef þú myndir setja rödd Celine Dion í My Heart Will Go On í staðinn fyrir rödd Jónsa í Dauðalogni.“

Gagnrýnandinn segir að fegurðin hafi ávallt verið aðall Sigur Rósar og ekki sé annað hægt en að heillast af lögunum Fjögur píanó og Varúð. Plötuna vanti samt í heildina meiri ákefð og spennu. „Ekki hata þá vegna þess að þeir spila fallega tónlist. Vertu frekar pirraður yfir því að fegurðin skiptir þá svona miklu máli.“ - fb