„Ástandið hérna er hrikalegt“

„Það er mjög sérstakt að horfa á þetta í sjónvarpinu, verandi svona stutt frá átökunum,“ segir Hilmar Júlíusson sem staddur er í Úkraínu í vinnuferð.

Hilmar átti upphaflega að vera á hóteli í miðbæ  Kænugarðs. „Mínir menn hérna úti voru búnir að átta sig á hlutunum og fengu annað hótel fyrir mig í útjaðri borgarinnar.“

Hilmar segir lætin einskorðast við miðbæinn. „Ástandið hérna er hrikalegt. Það er búið að loka öllum leiðum að miðbænum. Einnig er búið að loka neðanjarðarlestarkerfinu. Í miðbænum eru allar opinberar byggingar.“

Hann segist hafa verið heppinn að hafa ekki komið degi fyrr til Kænugarðs. „Ef ég hefði komið degi fyrr hefði ég getað lokast inni í miðbænum.“

Að komast frá Úkraínu verður ekki vandamál fyrir Hilmar. „Flugvöllurinn er sem betur fer sömu megin við fljótið [Dnieper fljótið] og ég er. Brúin yfir það er lokuð. Úr því að ég er réttu megin við fljótið mun ég komast á flugvöllinn,“ segir Hilmar.

Lögreglan í Úkraínu sótti að mótmælendum í dag, sem hafa haldið sig á Sjálfstæðistorginu í miðborg Kænugarðs í nokkra mánuði. Að minnsta kosti níu manns létust í átökunum í dag, þar af fjórir lögreglumenn. Sprengingar hafa átt sér stað og eldar loga á Sjálfstæðistorginu.

Þúsundir manna eru á torginu og leiðtogi stjórnarandstöðunnar, Arseniy Yatsenyuk segir að mótmælendur muni ekki hörfa eitt skref aftur á bak. Vitaly Klitschko, einn leiðtoga mótmælendanna hefur sagt konum og börnum að yfirgefa svæðið.

Mótmælendum var gefinn frestur til klukkan fjögur að íslenskum tíma til að hætta mótmælum og lögregla hafði umkringt sjálfstæðistorgið. Skömmu fyrir fjögur var kallað í gjallarhorni að lögreglan væri að hefja aðgerðir gegn mótmælendum. Þá var skotið úr vatnsfallbyssum á mótmælendur og lögreglan sótti fram á brynvörðum bílum.