Hnífsstunguárásin: Sagðist fyrr um kvöldið ætla að drepa félaga sinn með hnúajárni

Hæstiréttur hefur snúið við úrskurði Héraðsdóms Reykjavíkur um að maður sem játað hefur að hafa stungið annan mann, félaga sinn, í bakið við Sæmundargötu aðfaranótt sunnudags sæti ekki áfram gæsluvarðhaldi, en samkvæmt dómi Hæstaréttar mun maðurinn vera í gæsluvarðhaldi til 6. apríl næstkomandi.

Er maðurinn í gæsluvarðhaldi á grundvelli almannahagsmuna en í dómi Hæstaréttar segir að hann sé undir sterkum grun um tilraun til manndráps eða sérstaklega hættulega líkamsárás. Þá kemur jafnframt að maðurinn sem ráðist var á hafi verið í lífshættu þegar hann kom á slysadeild en hann var með stungusár neðarlega á baki sem olli rispu á lunga og fór djúpt inn í lifrina.

Sáu stóran blóðblett á baki mannsins

Atvik málsins eru rakin nokkuð ítarlega í úrskurði héraðsdóms. Er þar meðal annars greint frá framburði tveggja vitna sem sáu mennina í erjum úti á götu en þau hafi verið stödd í íbúð á 4. hæð og horft á atvikið út um glugga íbúðarinnar. Þau hafi séð brotaþola elta kærða í kringum bíl utan við húsið og hafi þau heyrt kærða segja að brotaþoli hafi skallað hann.

Þeir hafi svo farið nær byggingunni og horfið úr sjónmáli skamma stund en þegar vitnin sáu þá aftur hafi þau tekið eftir stórum blóðblett á baki brotaþola. Annað vitnið hafi þá kallað á hann en við það hafi hinn maðurinn farið á brott. Fólkið fór svo niður að huga að manninum sem hafði verið stunginn en þau spurðu hann hver hefði stungið hann. Hafi hann sagt að það hafi verið kærði en skömmu síðar missti hann meðvitund og hneig niður.

Vísaði lögreglu á hnífinn

Lögreglan handtók gerandann seinna um nóttina og viðurkenndi hann að hafa stungið hinn manninn í kjölfar slagsmála þeirra á milli. Hann var með skefti af hníf á sér en hnífsblaðið vantaði. Hann hafi hins vegar vísað á hnífsblaðið sem hafi fundist en það er 15 sentimetra langt og 2 sentimetrar á breidd.

Fram kemur í úrskurði héraðsdóms að við skoðun á síma mannsins hafi fundist Facebook-skilaboð á milli hans og vinar hans, en vinurinn sendir honum nokkur skilaboð milli klukkan 02.23 og 02.28 aðfaranótt sunnudags þar sem hann spyr „hvort hann þurfi að hafa áhyggjur af kærða eftir að kærði hafi hringt í hann og spurt hann út í hnúajárn sem hann hafi ætlað að nota til að drepa brotaþola.

Tekin hafi verið skýrsla af vitninu E vegna þessara skilaboða og hafi vitnið sagt að kærði hafi hringt í hann um miðnætti þann 6. mars sl. og beðið vitnið að lána sér hnúajárn og sagt að hann ætlaði að drepa brotaþola. Fyrr um kvöldið sagðist vitnið hafa verið með kærða og brotaþola heima hjá kærða og þá hafi verið gott á milli þeirra,” að því er segir í úrskurði héraðsdóms.

Tók mynd af rassi kærustu kærða

Deilurnar hófust eftir að sá sem fyrir árásinni varð tók mynd af rassi kærustu hins kærða. Þegar þeir voru tveir eftir í íbúðinni upphófust rifrildi og fór brotaþoli út. Hann kom þó aftur skömmu síðar og sagðist hafa gleymt einhverju áður en hann yfirgaf íbúðina aftur.

Kærði sagðist í skýrslutöku hafa farið út á bílastæðið fyrir framan íbúð sína, hann hafi óttast að félagi sinn myndi bíða þar eftir honum og því hafi hann tekið eldhúshníf sem hann hafði sett í vasann á úlpunni sinni. Er hann hafi verið fyrir utan hafi félagi hans komið aftur til hans og beðið hann um að hleypa sér aftur inn svo hann gæti náð í rafsígarettur þangað sem hann hafði gleymt.

Kærði vildi það ekki og tókust þeir á í framhaldinu. Brotaþoli hafi meðal annars slegið og skallað sig. Eftir það hafi átökin haldið eitthvað áfram og játar kærði að hafa stungið félaga sinn í bakið en neitar að hafa ætlað að drepa hann. Síðan hafi stúlka sem hafi verið stödd á svölum skammt frá kallað til sín og hann þá farið í burtu.

Eins og áður segir hefur maðurinn nú verið úrskurðaður í gæsluvarðhald. Manninum sem hann stakk í bakið er enn haldið sofandi í öndunarvél á gjörgæsludeild Landspítalans.