Mayweather sagður brjálaður út í Justin Bieber

Um fátt annað er rætt í íþróttaheiminum vestanhafs en bardaga Conor McGregor og Floyd Mayweather á laugardag en tónlistarstjarnan Justin Bieber mun þó líklega ekki láta sjá sig á bardaganum.

Bieber hefur verið einn helsti stuðningsmaður Mayweather undanfarin ár og gekk meira að segja með honum inn í hringinn fyrir bardaga gegn Manny Pacquiao á sínum tíma.

En Bieber hefur tekið til í sínu lífi - ræktað trúna og reynt að slíta tengslin við þá sem hafa neikvæð áhrif á hann. Fréttavefurinn mmamania.com fullyrðir að meðal þessa hafi verið að Bieber hætti að fylgja Mayweather á samfélagsmiðlum, svo sem Instagram.

Hnefaleikakappinn mun hafa tekið því afar illa og hafi orðið bálreiður. Til að bæta gráu á svart lét Bieber hafa eftir sér nýlega að hann efaðist um að Mayweather myndi takast að rota McGregor í bardaganum.

Conor og Mayweather berjast næstakomandi laugardag en bardaginn verður í beinni á Stöð 2 Sport. Hægt er að kaupa áskrift á 365.is.