Mesti lærdómurinn að vinnuvika kvenna er miklu lengri en karla

Unnsteinn Manuel Stefánsson, annar verndari UN Women á Íslandi og Örn Úlfar Sævarsson, stjórnarmeðlimur samtakanna voru staddir á HeForShe Rakarastofuviðburði (Barbershop) í Kaupmannahöfn í gær. Ráðstefnan var sett af Guðlaugi Þór Þórðarsyni, utanríkisráðherra.

Markmiðið með ráðstefnunni var meðal annars að hvetja karlmenn til að taka virkan þátt í beita sér fyrir kynjajafnrétti í sínu nærumhverfi. Á þessari rakararáðstefnu var sjónum beint að því hvernig jafna megi hlut kynja innan vinnustaða og heimila. Hvaða ólíku áskoranir konur og karlar standa frammi fyrir.   

„Það var mjög fræðandi að fá tækifæri til að kynna sér stöðu jafnréttismála bæði í atvinnu og útfrá heimilislífi fólks. Þó að Íslendingar séu komnir hvað lengst í þessum málum þá getum við ennþá bætt okkur á ýmsum sviðum,“ er haft eftir Unnsteini í tilkynningu frá UN Women.

„Mesti lærdómur dagsins er sá að ef við leggjum saman vinnutíma kynjanna innan og utan heimilis að þá er vinnuvika kvenna miklu lengri en karla. Þannig að næst er að efla hlutverk feðra innan heimilisins bæði sem „starfskraft“ og sem tilfinningaveru. Fyrsta skrefið í þá átt er að foreldrar fái jafnlöng fæðingarorlof,“ segir Unnsteinn Manuel hann en á ráðstefnunni kom fram að konur í Evrópu og Bandaríkjunum vinni að meðaltali rúmlega tvöfalt meiri ólaunuð störf en karlmenn. Þessi tala er allt að fjór- og sexföld í öðrum heimsálfum.

Gestir ráðstefnunnar og fyrirlesarar komu víða að úr einka-og opinbera geiranum og fluttu meðal annars starfsfólk frá Volvo og Ikea erindi á ráðstefnunni. Þá var Bjarni Bjarnason, forstjóri Orkuveitu Reykjavíkur einnig á meðal fyrirlesara.