Sigurður Ingi: Gætum verið að sigla inn í sama ástand og í fyrra ef flokkarnir ná ekki saman

Mér finnst þetta hafa gengið mjög vel“ segir Sigurður Ingi Jóhannsson, formaður Framsóknarflokksins þegar hann var spurður hvort hann væri upplitsdjarfur um að ná að mynda þriggja flokka ríkisstjórn með Vinstri grænum og Sjálfstæðisflokki í þjóðmálaþættinum Sprengisandi.

Flokkarnir sammála um það sem þurfi að gera

Sigurður Ingi telur að aðstæðurnar í samfélaginu kalli á stjórn sem geti farið í verkefni á borð við yfirvofandi kjarasamninga, uppbyggingu innviða og að efla samkeppnishæfi Íslands. „við erum dálítið sammála um það, þessi hópur, hvað gera þurfi,“ segir Sigurður Ingi um það hvernig viðræðurnar ganga. Hann telur brýnt að það sé öflug ríkisstjórn við stjórnvölinn sem geti tekið á þessum málum.

Bæði þekking og reynsla í flokkunum

Sigurður segir að samtal flokkanna þriggja hafi gengið mjög vel. „Það er augljóslega bæði mikil þekking og reynsla í þessum flokkum og sterkt bakland og það þarf auðvitað að eiga samtal við baklandið og þessi dagur verður notaður í það“ Þingflokkur Vinstri grænna mun funda síðdegis í dag um viðræðurnar en ekki er vitað til formlegra funda þingflokka Sjálfstæðisflokks og Framsóknarflokks.

Spurður að því hvor það sé mikill munur á viðræðunum nú en fyrir ári segir Sigurður Ingi svo vera. „Já mér fannst til dæmis umræðan um uppbyggingu heilbrigðiskerfisins í fyrra, eigum við að nota orðið, svolítið stórkarlaleg“, það voru allir með miklar yfirlýsingar en kannski ekki nægilega skýra sýn á hvað gera þyrfti. Þetta ár hefur kannski skilað dálítið litlu, ég held að það séu margir vonsviknir yfir því en á sama tíma hefur margt skýrst.“

Ef ekki tekst að mynda þessa ríkisstjórn segir Sigurður Ingi „þrengjast um kosti“ og að mögulega stefni í ástand eins og ríkti í fyrra „þar sem þetta gekk auðvitað bara illa, stjórnmálamönnum ekki til mikils sóma.“ Sigurður segir jafnframt að þrátt fyrir að flokkarnir þrír séu ólíkir gæti þetta orðið „mjög góð stjórn í þeim aðstæðum sem við búum við á Íslandi í dag,“ segir Sigurður.

Flokkarnir með sameiginlega sýn

Sigurður Ingi segir að helsta vandamál Íslands sé pólitískur óstöðugleiki og til þess að ná fram sátt í samfélaginu telur hann þörf á „breiðri stjórn“ sem nái frá vinstri og hægri og yfir miðju. Hann segir að það hafi verið ánægjulegt að flokkarnir hafi haft sameiginlega sýn á það sem þyrfti að gera í samfélaginu fyrir kosningar. „Það voru velferðarmál, samgöngur, byggðir landsins, að allir landsmenn sitji við sama borð þegar kemur að þjónustu ríkisins og við erum akkúrat stödd þar og við getum farið í slík verkefni.“

„Getum við ekki öll verið sammála um það?“

„Það eru að ég held talsvert ólíkar væntingar úr þessum ólíku herbúðum en það sem allir eru sammála um, við núna í pólitíkinni í aðdraganda þessara kosninga töluðum held ég allir flokkar um með einhverjum hætti er. Það er sem sagt uppbyggingin í heilbrigðiskerfinu og menntakerfinu. Það er um það hvernig við gerum Ísland samkeppnishæfara inn í lengri framtíð, bæði fyrir unga fólkið okkar en líka alla hina hérna sem búa hérna á landinu. Hvernig viðhöldum við þessum efnahagslega stöðugleika sem við höfum náð frábærum árangri í á síðastliðnum árum?,“ segir Sigurður Ingi sem telur slagorð nýafstaðinnar kosningabaráttu Framsóknarflokksins eiga vel við nú: „Getum við ekki öll verið sammála um það?“