Macron blæs til stórsóknar gegn kynbundnu ofbeldi

Emmanuel Macron, forseti Frakklands, heitir stórsókn gegn kynbundnu ofbeldi. Þetta kom fram í ræðu forsetans sem hann hélt í París í dag af tilefni sextán daga átaksins gegn kynbundnu ofbeldi. Dagurinn í dag var alþjóðlegur baráttudagur Sameinuðu þjóðanna gegn kynbundnu ofbeldi og markar upphaf átaksins sem haldið er til vitundarvakningar um umfang vandans. Hann segir að Frakkland sé „sjúkt af kynjamisrétti.“ Frá þessu er greint á vef AFP.

Macron hóf ræðuhöldin á því að biðja um mínútu þögn til þess að heiðra minningu þeirra hundrað tuttugu og þriggja kvenna sem drepnar voru af maka sínum eða fyrrverandi maka á síðasta ári.

„Frakkland getur ekki lengur verið á meðal þeirra landa þar sem konur óttast um öryggi sitt,“ segir Macron sem heitir því að baráttan gegn „hræðilegu og skammarlegu“ ofbeldi gegn konum verði eitt af aðalmálefnum ríkisstjórnarinnar.

Í ræðunni varpar forsetinn ljósi á þær aðgerðir sem hann hyggst ráðast í á kjörtímabilinu. Farið verður í herferð gegn kynferðislegri áreitni gegn konum á götum úti en götuáreiti er umfangsmikið vandamál í Frakklandi.

Þá talar forsetinn fyrir því að herða á lögunum um aldur einstaklinga og samræði. Hann vill breyta lögunum þannig að það sé lögbrot að hafa samræði við barn sem er yngra en fimmtán ára.

Macron vill auðvelda konum að leggja fram kæru og hyggst hann búa svo um hnútana að konur geti komist í beint samband við lögregluna í gegnum netið á öllum tímum sólarhringsins.

Þá ætlar Macron sjálfur að taka þátt í vitundarvakningu um kynferðislega áreitni í skólum landsins.