Unnið að hreinsun eftir sjávargang á Eiðsgranda

Starfsmenn Reykjavíkurborgar hafa í morgun unnið að hreinsun á Eiðsgranda þar sem stórir hnullungar enduðu á landi vegna mikils sjógangs. Mikill öldugangur var á svæðinu og gengu öldur á land með miklum látum í gærkvöldi. Sjórinn reif einnig upp torf og annað.

Jón Halldór Jónasson, upplýsingafulltrúi Reykjavíkurborgar, segir að unnið verði að því að hreinsa það allra versta í dag en það verði ef til vill ekki klárað í dag.

Sjór hefur gengið á land á þessu svæði í nokkur ár. Eftir um það bil tvær vikur mun verktaki hefja vinnu við að brekka varnargarðinn. Þannig eigi að brjóta öldurnar lengra frá landi og koma í veg fyrir tjón.

Hér má sjá myndband sem tekið var í gærkvöldi og sýnir hvernig útlit var á svæðinu og myndir sem teknar voru í morgun.