Súper­man snéri aftur með stæl, Brady tapaði og tengda­sonurinn vaknaði

Tengdasonurinn Patrick Mahomes hefur átt erfiðar vikur að undanförnu en Mahomes leit mjög vel út í sannfærandi 41-14 sigri Kansas City Chiefs á Las Vegas Raiders í nótt.

Mahomes gaf alls fimm snertimarkssendingar í leiknum án þess að kasta boltanum frá sér einu sinni en hafði verið með samtals fjórar snertimarkssendingar og fjóra tapaða bolta í fjórum leikjum þar á undan.

Chiefs vann nauma sigri síðustu tvær helgar á undan og var því að vinna sinn þriðja leik í röð en þetta var fyrsti leikur liðsins í langan tíma þar sem sýndi eitthvað af því sem menn vita að býr í liðinu.

Einhverjir voru eflaust farnir að hafa áhyggjur af Mahomes og Chiefs liðinu en þetta var stór yfirlýsing frá þeim um að þeir ætla að vera með í baráttunni í vetur.

Tom Brady og félagar í meistaraliði Tampa Bay Buccaneers fengu frí í síðustu viku en litu ekki vel út í 29-19 tapi á móti Washington Football Team. Hlauparinn Antonio Gibson, sem hefur verið að glíma við meiðsli, skoraði tvö snertimörk í leiknum og sóknarleikur Brady og félaga leit afar illa út fram eftir leik.

Endurkoma helgarinnar var án nokkurs vafa þegar Cam Newton spilaði sinn fyrsta leik með Carolina Panthers í nokkur ár. Newton var í aukahlutverki en stal samt fyrirsögnunum.

Panthers vann þá sannfærandi 34-10 á toppliði Arizona Cardinals og Súperman, eins og hann var kallaður á fyrri tímum með Carolina Panthers, átti ótrúlega byrjun. Hann hafði ekki fengið lið frá því að Patriots létu hann fara í haust en steig inn í meiðslavandræðum síns gamla félaga.

Newton minnti heldur betur á gömlu góðu dagana þegar hann skoraði snertimörk í tvö fyrstu skiptin sem hann snerti boltann. PJ Walker byrjaði sem leikstjórnandi liðsins og spilaði stærsta hluta leiksins en Newton skilaði stigunum á töfluna í upphafi leiks.

Newton kom tvisvar inn á í byrjun leiks eftir að Panthers liðið var komið upp að marklínu Arizona. Fyrst skoraði Cam sjálfur með því að hlaupa með boltann í markið og svo átti hann snertimarksendingu á útherjann Robby Anderson. Eftir fyrra snertimarkið öskraði hann margoft: Ég er kominn aftur.

Green Bay Packers er nú með besta árangurinn, við hlið Arizona Cardinals, eftir 17-0 sigur á Seattle Seahawks. Bæði lið eru með átta sigra og tvö töp. Leikstjórnendur liðanna Aaron Rodgers hjá Packers og Russell Wilson hjá Seahawks, snéru báðir aftur. Rodgers fékk kórónuveiruna en Wilson hafði misst af fjórum leikjum vegna meiðsla. Þetta var í fyrsta sinn á ferlinum sem lið Wilson skorar ekki stig.

Fyrsta jafntefli tímabilsins varð þegar leikur Detroit Lions og Pittsburgh Steelers endaði 16-16 eftir framlengingu. Detroit var búið að tapa fyrstu átta leikjum sínum en er áfram eina liðið sem hefur ekki unnið leik.

Buffalo Bills, Dallas Cowboys og New England Patriots unnu öll stórsigra.

Bills-liðið kom til baka eftir vandræðalegt tap á móti Jacksonville með því að vinna 45-17 sigur á New York Jets.

Dallas Cowboys fór á kostum í 43-3 heimasigri á Atlanta Falcons og New England Patriots sýndi mikinn styrk með því að vinna 45-7 sigur á reyndar vængbrotnu liði Cleveland Browns, sem ofan á hlauparaleysið missti leikstjórnandann Baker Mayfield meiddan af velli.