Um­fjöllun: Breiða­blik - KR 137-85 | Blikar upp fyrir KR eftir skot­­sýningu í Smáranum

Heimamenn voru með yfirhöndina strax frá upphafi en það virtist þó sem við myndum fá alvöru leik í fyrsta leikhluta. Annað átti heldur betur eftir að koma á daginn. 

Sóknarleikur heimamanna var framúrskarandi í fyrri hálfleik – Breiðablik skoraði 65 stig – en í þriðja leikhluta gerði Breiðablik eitthvað sem fá lið eru fær um.

Á aðeins tíu mínútna kafla skoruðu heimamenn 47 stig gegn 17 stigum gestanna. Gerðu þeir með endanlega út um leikinn en munurinn var 45 stig fyrir fjórða og síðasta leikhluta leiksins. Fór það svo að Breiðablik vann leikinn með 48 stiga mun, lokatölur 135-87.

Sigurinn lyfti heimamönnum upp fyrir KR í töflunni en bæði lið eru nú með 10 stig, líkt og ÍR sem situr í 8. sætinu. Breiðablik er í 9. og KR kemur þar á eftir.

Hverjir stóðu upp úr?

Það er erfitt að velja leikmenn sem sköruðu fram úr í liði heimamanna en alls skoruðu sjö leikmenn 12 stig eða meira. Stigahæstur var Hilmar Pétursson með 23 stig, Everage Lee Richardson kom þar á eftir með 26 stig ásamt því að taka 10 fráköst. Árni Elmar Hrafnson var svo með 18 stig og 7 stoðsendingar.

Hjá KR var Adama Kasper Darbo með 20 stig og Þorvaldur Orri Árnason með 19 stig.

Tölfræði sem vakti athygli

Breiðablik skoraði körfur í öllum regnbogans litum og það er ljóst að varnarleikur KR var ekki upp á marga fiska miðað við hversu mörg skot heimamenn fengu að taka í kvöld. Að hitta 50 prósent úr þriggja stigum skotum er mögnuð tölfræði en það sem gerir hann enn magnaðri er að Blikar tóku 50 skot fyrir utan þriggja stiga línuna og 25 þeirra rötuðu ofan í körfuna.

Þá skoruðu heimamenn úr öllum 12 vítaskotum sínum í leiknum.

Subway-deildirnar í körfubolta eru á Stöð 2 Sport en upplýsingar um útsendingar má finna hér. Subway-deildin er hluti af Stöð 2 Sport Ísland sem kostar 3.990 krónur á mánuði.