Á skilorði en heldur áfram að bera sig

Maðurinn er heimilislaus og hefur stundað það síðustu ár að sýna á sér kynfærin við æfingasvæði Ármanns og Þróttar í Laugardalnum. Í samtali við fréttastofu segir móðir stúlku sem karlmaðurinn beraði sig fyrir framan í gær að maðurinn dvelji í hverfinu og komi reglulega að æfingasvæðinu.

Stúlkan lét móður sína vita beint eftir atvikið og hringdi hún á lögreglu en þegar lögregla kom á staðinn var maðurinn á bak og burt. Í færslu úr dagbók lögreglu um málið segir að tilkynnt hafi verið um „afbrigðilega hegðun“ í hverfi 105 og að málið hafi verið afgreitt á vettvangi.

Maðurinn var dæmdur í fimm mánaða skilorðsbundið fangelsi í mars á þessu ári fyrir að hrækja á lögreglumann og fyrir að bera sig og kasta af sér þvagi í viðurvist barna við æfingasvæði í Laugardalnum.

Þá var honum gert að greiða börnunum fjórum sem hann kastaði af sér þvagi fyrir framan, hverju um sig, 200 þúsund krónur.

Í samtali við DV segir Guðmundur Pétur Guðmundsson, lögreglufulltrúi á lögreglustöðinni við Hverfisgötu, að ekki sé hægt að gera neitt í málinu þar sem þeir hafi engin sönnunargögn gegn honum.

„Þetta er hegðun sem gengur ekki en við verðum alltaf að hafa sönnunargögn,“ er haft eftir Guðmundi.