Fá eldri skriðdreka en fá þá fyrr

Bandaríkjamenn vonast til þess að skriðdrekarnir geti verið komnir á vígvöllinn eftir átta til tíu mánuði.

Sömuleiðis stendur til að koma Patriot-loftvarnarkerfum fyrr til Úkraínu en áður. 65 úkraínskir hermenn munu ljúka þjálfun á þessi kerfi á næstu dögum og verða þau send til landsins á næstu vikum.

Taka skriðdreka beint frá hernum

Bandaríkjamenn tilkynntu fyrr á árinu að 31 M1A2 Abrams skriðdreki yrði sendur til Úkraínu og að það myndi taka allt að tvö ár að smíða þá og flytja til landsins. Nú hefur verið tekin sú ákvörðun að senda M1A1 skriðdreka sem hægt sé að taka beint úr vörslu bandaríska hersins og flytja til Úkraínu fyrir árslok.

Helsti munurinn á M1A1 og M1A2 skriðdrekunum er að þeir nýrri eru með betri búnað sem notaður er til að miða á skotmörk.

Þetta hafði AP fréttaveitan eftir heimildarmönnum sínum úr Pentagon, varnarmálaráðuneyti Bandaríkjanna. Ákvörðunin var svo tilkynnt af ráðamönnum í dag.

Olaf Scholz, kanslari Þýskalands, er sagður hafa krafist þess að Bandaríkjamenn sendu skriðdreka til Úkraínu og sagt það vera skilyrði fyrir því að Þjóðverjar myndu gefa grænt ljós á sendingar Leopard 2 skriðdreka til landsins. Þeir eru hannaðir og framleiddir í Þýskalandi og því þurftu Þjóðverjar að samþykkja sendingarnar.

Bandaríkjamenn drógu í efa að Abrams skriðdrekar hentuðu Úkraínumönnum þar sem þeir væru óhentugir. Sérstakt eldsneyti þarf til að keyra túrbínur skriðdrekanna og þá eru þeir sagðir þurfa umfangsmeiri innviði og að erfiðara sé að halda þeim við en Leopard 2 skriðdrekunum.

Sjá einnig: Segja að vestrænir skriðdrekar brenni eins og aðrir

Eftir miklar viðræður var þetta græna ljós gefið í janúar en síðan þá hefur gengið misvel að senda skriðdreka til Úkraínu og finna þann fjölda skriðdreka sem upphaflega var lofað.

AP segir óljóst hvenær þjálfun úkraínskra hermanna á Abrams skriðdrekana mun hefjast. Þjálfa þarf töluverðan fjölda hermanna í að nota, viðhalda og gera við skriðdrekana.

Fá tvö Patriot-kerfi á næstu vikum

Joe Biden, forseti Bandaríkjanna, tilkynnti í desember að Patriot-loftvarnarkerfi yrði sent til Úkraínu. Það er háþróað kerfi sem er sagt sérstaklega skilvirkt við það að skjóta niður stýri- og eldflaugar. Um þetta leyti gerðu Rússar stöðugar árásir á borgaralega innviði Úkraínu og lögðu Úkraínumenn mikið kapp á að fá fleiri og betri loftvarnarkerfi.

Þessum árásum hefur verið haldið áfram en þeim hefur farið fækkandi.

CNN segir frá því að sú ákvörðun hafi verið tekin að flýta sendingu tveggja Patriot-kerfa til Úkraínu. 65 úkraínskir hermenn hafa verið við þjálfun í notkun þeirra í Oklahoma í Bandaríkjunum en þeir verða sendir til Evrópu á næstu dögum.

Þar munu þeir fá frekari þjálfun í notkun kerfanna en eitt þeirra kemur frá Bandaríkjunum og hitt frá Þýskalandi og Hollandi.

CNN hefur eftir yfirmanni herstöðvarinnar þar sem úkraínsku hermennirnir hafa verið í þjálfun að þeir hafi mikla reynslu af öðrum loftvarnarkerfum og átökum. Þeir hafi verið fljótir að læra á Patriot-kerfin en þeir munu ljúka þjálfun sem iðulega tekur tíu vikur á átta.

Vinna að gagnárásum

Úkraínumenn hafa verið að byggja upp nýjar sveitir á undanförnum vikum og mánuðum, samhliða því að verjast mjög umfangsmiklum árásum Rússa í austurhluta Úkraínu.

Úkraínumenn segjast valda miklu mannfalli meðal rússneskra hermanna í og við Bakhmut, þrátt fyrir erfiðar aðstæður fyrir úkraínska hermenn, sem hafa einnig fallið í miklum fjölda. Þar sem Rússar hafa að mestu verið að sækja fram þá hefur mannfallið líklega verið meira hjá þeim en Úkraínumönnum en sérfræðingar segja að hlutfallið hafi versnað fyrir Úkraínumenn samhliða því að Rússar hafa sótt fram norður af bænum og næstum því umkringt hann.

Markmið Úkraínumanna virðist vera að veikja Rússa eins og þeir geta og reyna svo gagnárásir þegar vorið nálgast.