Eigi að hafa meiri á­hyggjur af eignum ríkisins en er­lendra auð­manna

Kaup erlendra ríkisborgara á íslenskum jörðum og auðlindum hefur reglulega komið til tals og nú síðast þegar fregnir bárust af kaupum erlendra fjárfesta á stórum hlut í félagi sem hefur umfangsmikil vatnsréttindi og átappar vatni á Hlíðarenda í Ölfusi undir merkjum Icelandic Glacial.

Þá komst það í fréttir í fyrra þegar Árni Hjörleifsson seldi jörðina Horn í Skorradal til erlendra aðila. Á Horni er að finna Skessuhorn, eitt þekktasta fjall Borgarfjarðar og vinna nýir eigendur nú að stórfelldri uppbyggingu íbúðahúss og gestahúss á landinu.

„Það er á ferðinni alls konar lið sem er í nöp við allt sem heitir sala á jörðum, ekki bara til útlendinga heldur líka til einhverra auðmanna og alls konar kjaftæði sem er í gangi, hvort sem það stjórnast af öfundsýki eða hvað það er, eða svona mikilli tilfinningu fyrir því að ríkið eigi allt,“ sagði Árni í Bítinu á Bylgjunni.

Það hafi ekki verið síður rætt um það þegar hann og eiginkona hans Ingibjörg Davíðsdóttir festu kaup á Horni á sínum tíma. Þá hafi hann verið kallaður íslenskur auðmaður búsettur í Vínarborg.

„Við bjuggum í Vínarborg einmitt á þessum tíma og Ingibjörg var að vinna hjá utanríkisráðuneytinu. Við vorum sögð á framfærslu utanríkisþjónustunnar í útlöndum, værum að fjárfesta í jörð á Íslandi og svo værum við að loka aðgengi að Skessuhorni,“ segir Árni og bætir við að það síðastnefnda hafi ekki getað verið fjarri sannleikanum.

„Það var hlið fyrir þarna sem fyrri eigandi hafði sett upp vegna þess að hann vildi ekki að það væru rútur og alls konar bílar heima á hlaði á bænum.“

Hann hafi jafnframt bent fólki á að við hliðina á því væri gönguhlið sem væri opið fyrir alla og hann hafi frekar hvatt fólk til þess að mæta og ganga á Skessuhorn.

Erlendir kaupendur duglegir að halda jörðum við

„Ég geri mér alveg grein fyrir því að það eru skiptar skoðanir en bullið og þvælan er svo mikil og staðreyndin er sú að erlendir kaupendur eru nú ekki verstu kaupendurnir, því það eru aðilar sem gera eitthvað á jörðunum sínum og halda þeim við og annað því um líkt. 

Eru mörg dæmin á landinu þar sem menn eru að byggja upp hestabúgarða og ræktun á hestum og halda öllu vel við og eru með fjölda manns í vinnu. Þannig að ég held að það sé nú meiri hættan á endalausum innflutningi á fólki sem kemur ekki með neitt með sér heldur fámennum hópi fjárfesta sem byggir upp á jörðum á landinu,“ segir Árni.

Íslendingar séu ekki endilega bestu kaupendur jarða en hann geri sér jafnframt grein fyrir því að það sé ekki nein skynsemi í því að „selja endalaust land til útlendinga frekar en annarra.“ Stjórnmálamenn sem tali gegn sölu jarða til erlendra ríkisborgara ætti frekar að líta í eigin barm.

„Staðreyndin er bara sú að ríkið er versti eigandi jarða því engu er haldið við svo sem girðingum, húsum og land fer venjulega í órækt og í mörgum tilvikum fer allt í eyði og dæmi um það um allt land,“ segir Árni.

„Ég held að sveitarstjórnarmenn allt í kringum landið þekki það að þeir eru verstu kaupendurnir því það fer allt í niðurníðslu.“

Árni fullyrðir að ákveðinn hópur fólks hafi almenna andúð á því að land og aðrar eignir séu í einkaeigu og vilji frekar sjá ríkið stjórna öllu. Árni segir þetta dæmi um „marxískan hugsunarhátt“ og minnir á að Íslendingar hafi lengi fjárfest í landi og öðrum eignum erlendis.

Byggja yfir 1.700 fermetra á svæðinu

Árni segir hjónin sem keyptu jörðina Horn koma frá Kanada og Úkraínu og hafa mikinn áhuga á Íslandi. Þau séu í dag búsett í Dúbaí en ekki hefur verið greint frá nöfnum hjónanna. Samkvæmt opinberum gögnum er félag sem á jörðina skráð á gríska lögfræðinga og endurskoðendur sem hafa að líkindum haft milligöngu um kaupin. 

Að sögn Árna lýsti konan yfir áhuga á því að ala upp börn á Íslandi þar sem það væri svo barnvænt samfélag. Yfirvöld í Skorradal hafa veitt byggingarleyfi fyrir 992 fermetra íbúðarhúsi á Horni og 723 fermetra gestahúsi. Framkvæmdir eru hafnar á svæðinu.

„Ég var búinn að vera oddviti í átta ár og ég sagði að ég myndi selja jörðina þegar ég hætti og það voru nokkrir aðilar sem voru að hugsa um þetta og þar á meðal útgerðarmenn sem voru að velta fyrir sér kolefnisjöfnun og öðru slíku en þessi ungu hjón voru með mikil plön um það að byggja mikið upp.

Ég féll svolítið fyrir því sem fyrrverandi oddviti að það yrði eitthvað gert á staðnum og þau voru búin að leggja til hliðar hátt í tvo milljarða til þessara framkvæmda. Það er allt á fullu þarna upp frá, það er stórkostleg vegagerð og uppbygging á staðnum og það er bara í samræmi við það sem þau sögðu að þau myndu fara í. Ég held að þetta sé kostur fyrir sveitarfélagið að fá innspýtingu í sveitarfélagið,“ segir Árni.