Viðskipti innlent

Síðasta vonin gæti verið Húnaflóatorfa

Kristján Már Unnarsson skrifar
Birkir Bárðarson fiskifræðingur er verkefnisstjóri loðnuleitarinnar.
Birkir Bárðarson fiskifræðingur er verkefnisstjóri loðnuleitarinnar. Arnar Halldórsson

Eftir árangurslausar tilraunir til að finna loðnuna hefur verið ákveðið að efna til nýs leitarleiðangurs í von um að afstýra loðnubresti. Skammur tími er til stefnu áður en loðnan drepst og verður lagt í hann strax á morgun.

Loðnan er næstverðmætasti veiðistofn Íslendinga á eftir þorskinum. Hún er svo mikið ævintýri að aðeins fárra vikna veiði getur skilað tugmilljarða króna útflutningstekjum. Það er því ekki nema von að útgerðin og Hafrannsóknastofnun efni núna til þriðju leitarinnar frá áramótum. Sjávarútvegsfyrirtækin greiða tvo þriðju hluta kostnaðar að þessu sinni.

„Já, það er augljóst að það er mikið undir. Og einmitt vegna þess hvað þetta er skammlífur stofn og miklar sveiflur í honum, að þá er þetta mikil spenna í kringum þetta,“ segir Birkir Bárðarson, fiskifræðingur og verkefnisstjóri loðnuleitar, í viðtali í fréttum Stöðvar 2.

Heimaey VE-1, eitt af skipum Ísfélagsins, mun leita miðin út af Vestfjörðum og Norðurlandi vestra.Vilhelm Gunnarsson

Hvorugt skip Hafrannsóknastofnunar mun þó taka þátt í leitinni heldur þrjú skip frá útgerðinni. Ásgrímur Halldórsson og Polar Ammassak halda á morgun til leitar undan Suðausturlandi og Heimaey fer á föstudag til leitar undan Vestfjörðum og vestanverðu Norðurlandi.

„Það er ennþá von. Við þurfum ekki að fara lengra aftur en í síðasta ár. Í febrúar í fyrra birtist mikið magn af loðnu út af Húnaflóa á þessum tíma, svipuðum tíma og núna. Það er ennþá möguleiki að það geti til dæmis eitthvað birst á því svæði.“

Þar fannst raunar óvænt risatorfa í fyrra.

„Þá birtust 400 þúsund tonn þarna út af Húnaflóanum, rúmlega það,“ segir fiskifræðingurinn.

Höfn í Hornafirði er í hópi loðnuvinnslubæja. Ásgrímur Halldórsson við bryggju. Vinnsluhús Skinneyjar-Þinganess fyrir aftan.Arnar Halldórsson

Niðurstöður loðnuleitarinnar gætu legið fyrir um eða upp úr næstu helgi. En ef eitthvað finnst er hins vegar ljóst að þá verður skammur tími til stefnu því það styttist í hrygningu loðnunnar.

„Ég held að það sé alveg ljóst að það er orðinn stuttur tími líka fyrir skipin að veiða þetta. Þannig að stutta svarið er kannski að þetta verður ekki risavertíð. Það held ég að hljóti að vera ljóst.

En nákvæmlega hvað magnið verður og hvort það verður eitthvað, það verða bara niðurstöðurnar okkar að leiða í ljós,“ segir Birkir.

Hér má sjá frétt Stöðvar 2:

Loðnuveiðar Sjávarútvegur Efnahagsmál Vísindi Vestmannaeyjar Fjarðabyggð Langanesbyggð Vopnafjörður Múlaþing Sveitarfélagið Hornafjörður Akranes Síldarvinnslan Ísfélagið Brim

Tengdar fréttir

Byggðirnar bíða spenntar fregna um hvort loðnuganga sé fundin

Vonir um loðnuvertíð þennan veturinn hafa glæðst eftir að fiskiskip urðu vör við flekki djúpt út af Suðausturlandi í gær, sem líklegt þykir að séu stórar loðnutorfur. Í loðnubyggðum landsins bíða menn spenntir fregna um hvort loðna sé fundin í nægilegu magni til að leyfa veiðar.

Lík­lega engin stór loðnu­torfa fyrir suð­austan

Loðnutorfan sem skipstjórar þriggja uppsjávarveiðiskipa sáu undan Suðausturlandi í vikunni er ekki stór að sögn Guðmundar J. Óskarssonar, sviðsstjóra uppsjávarsviðs Hafrannsóknarstofnunar. Ekki er komin niðurstaða en engar vísbendingar benda til þess að eitthvað stórt sé þarna á ferðinni. 

Óvænt loðna í Húnaflóa ávísun á mikil verðmæti

Miklar loðnutorfur hafa óvænt fundist norður af Húnaflóa og tilkynnti Hafrannsóknastofnun í dag að búast mætti við að minnsta kosti eitthundrað þúsund tonna aukningu loðnukvótans. Viðbótin gæti skilað tíu milljarða króna útflutningsverðmæti.



Mest lesið


Fleiri fréttir

Sjá meira


×

Mest lesið