Síleskt fé­lag Björg­ólfs í greiðslu­stöðvun og hann hrynur niður listann

Síleska fjarskiptafélagið WOM, sem Novator, fjárfestingarfélag Björgólfs Thors, keypti árið 2015 hefur sótt um greiðslustöðvun í Bandaríkjunum til þess að koma rekstri sínum aftur á réttan kjöl. Eftir ævintýralegan vöxt, sem fól meðal annars í sér útrás til annarra landa Suður-Ameríku, er félagið nú í miklum fjárhagskröggum.

Í yfirlýsingu frá Chris Bannister, forstjóra WOM, segir að eftir hafa farið vandlega yfir fjárhag félagsins hafi stjórnendur þess komist að þeirri niðurstöðu að besti möguleikinn í stöðunni væri að sækja um greiðslustöðvun í Bandaríkjunum.

Þar með er félagið að nýta sér svokallað „chapter 11 bankruptcy“ sem svipar helst til greiðslustöðvunar í skilningi laga um gjaldþrotaskipti og fleira hér á landi. Slík greiðslustöðvun gerir félögum og einstaklingum kleift að komast í tímabundið skjól frá kröfuhöfum á meðan skuldarar koma fjármálum sínum í rétt horf.

Reyndu að endurfjármagna 348 milljóna dala lán og skulda 1,8 milljarða dala

Í frétt Bloomberg um málið segir að ákvörðunin hafi verið tekin í kjölfar þess að félaginu tókst ekki að endurfjármagna 348 milljóna dala lán sem er á gjalddaga í nóvember næstkomandi. 348 milljónir dala eru tæplega 49 milljarðar króna.

Þá segir að í yfirlýsingu Bannisters að greiðslustöðvunin geri félaginu kleift að halda áfram rekstri á meðan það setur upp endurgreiðsluáætlun á skuldbindingum þess, sem nema um 1,8 milljörðum dala. Það gerir um 252 milljarða króna. Árið 2019 var greint frá því að WOM hefði sótt 600 milljóna dala fjármögnun með útgáfu skuldabréfa. Þá fóru 350 milljónir í endurfjármögnun WOM en 250 milljónir, um þrjátíu milljarðar króna í arðgreiðslu til Novator.

Í annarri yfirlýsingu frá WOM segir að félagið hefði tryggt sér fjármögnun frá JPMorgan Chase & Co. að fjárhæð 200 milljónum dala.

Lánshæfismatið komið niður í D-flokk

Í kjölfar tilkynningar um greiðslustöðvunina ákvað matsfyrirtækið S&P að lækka lánshæfismat WOM úr CCC í D. 

Í tilkynningu á vef S&P segir að stjórnendur félagsins hafi unnið að endurfjármögnunarleiðum í um það bil ár. Erfiðar markaðsaðstæður, með litlum áhuga fjárfesta og miklum lántökukostnaði, hafi komið í veg fyrir að félagið næði að endurfjármagna sig með hagkvæmum hætti. Á sama tíma hafi lausafjárstaða félagsins versnað.

Sams konar tilkynning var gefin út um miðjan mars þegar S&P lækkaði lánshæfismat félagsins úr B í CCC.

Hrynur niður listann en ekki á neinu flæðiskeri staddur

Eignarhlutur Novator í WOM er drjúgur hluti eigna Björgólfs Thors og því þarf það ekki að koma neinum á óvart að Forbes, sem heldur úti lista yfir heimsins ríkasta fólk, metur auðæfi Björgólfs talsvert minni en í fyrra. 

Í lista ársins 2023 var Björgólfur í sæti 1.217 yfir ríkasta fólk heims og auður hans metinn á 2,5 milljarða dala, sem gerir um 350 milljarða króna. Í ár er hefur hann fallið niður um rúmlega 300 sæti í sæti 1.545 og auður hans um 400 milljónir dala í 2,1 milljarð. Það eru um 293 milljarðar króna. 

Hann er annað árið í röð eini Íslendingurinn á listanum, sem nær aðeins yfir fólk sem á milljarð dala eða meira. Davíð Helgason var með honum á listanum árið 2022.