Vill inn­flytj­endur frá „huggulegum“ löndum eins og Dan­mörku

Trump hefur á undanförnum vikum í minnst tveimur ræðum líkt farand- og flóttafólki við dýr.

Hann hélt um 45 mínútna ræðu á fjáröflun fyrir auðjöfra á laugardagskvöldið en Trump er sagður hafa farið um víðan völl í ræðu sinni. Stór hluti ræðunnar snerist þú um farand- og flóttafólk, samkvæmt heimildum New York Times.

Eftir að Trump talaði um að glæpamenn frá hörmulegum löndum væru að flæða til Bandaríkjanna virtist hann vísa til umdeildra ummæla sinna frá 2018, þegar hann lýsti Haítí og nokkrum Afríkuríkjum sem „skítaholum“.

Sjá einnig: Trump vill Norðmenn frekar en innflytjendur frá „skítaholum“

„Þegar ég segi, þið vitið, af hverju við leyfum ekki fólki frá huggulegum löndum að koma, þá er ég að reyna að vera indæll,“ sagði Trump. „Hugguleg lönd eins og Danmörk, Sviss? Erum við að fá eitthvað fólk frá Danmörku? Hvað með Sviss? Hvað með Noreg?“

Þá bætti Trump við að fólk hefði tekið ummælum honum um „skítaholu“-löndin illa en honum þætti þau ummæli fín. Í kjölfarið kvartaði hann yfir því að fólk frá Jemen, þar sem fólk væri „að sprengja hvort annað í loft upp út um allt“, væri að ferðast til Bandaríkjanna.

Líkti farand- og flóttafólki við dýr

Umferð farand- og flóttafólks um landamæri Bandaríkjanna og Mexíkó hefur aukist verulega og hefur Trump farið hörðum orðum um Joe Biden, sitjandi forseta og mótframbjóðanda sinn, vegna ástandsins.

Trump sjálfur kom þó í veg fyrir umfangsmiklar aðgerðir á landamærunum þegar hann skipaði Repúblikönum að samþykkja ekki frumvarp sem þingmenn beggja flokka hefðu komið að því að semja og sagði hann opinberlega að ástæðan væri sú að hann vildi nota ástandið á landamærunum í kosningabaráttu sinni gegn Biden.

Sjá einnig: Snerist hugur nokkrum tímum eftir að hann sagði aðgerðir nauðsynlegar

Eins og áður segir hefur Trump í minnst tveimur ræðum á undanförnum vikum talað um farand- og flóttafólk sem dýr. Það gerði hann síðast í Michigan í síðustu viku.

„Þeir eru að senda fanga, morðingja, fíkniefnasala, geðsjúklinga og hryðjuverkamenn. Þá verstu,“ sagði Trump. Hann sagði þetta ekki gerast eingöngu í Suður-Ameríku heldur væri allur heimurinn að senda hræðilegt fólk til Bandaríkjanna.

„Þeir koma frá Kongó, Jemen, Sómalíu, Sýrlandi, þeir koma frá öllum heimshornum, Kína.“

Flestir sem fara yfir landamæri Mexíkó og Bandaríkjanna eru samkvæmt embættismönnum fjölskyldufólk á flótta undan fátækt og ofbeldi. Þetta er ekki í fyrsta sinn sem Trump talar um farand- og flóttafólk með þessum hætti. Þá hefur hann áður sakað farand- og flóttafólk um að vera „eitur í blóði“ Bandaríkjanna.

Í ræðu sinni gagnrýndi Trump Biden og sagði hann hafa tekið slæmar ákvarðanir við sögufrægt skrifborð Hvíta hússins, sem hefur verið notað af á þriðja tug forseta Bandaríkjanna. Resolute-skrifborðið var sent sem gjöf frá Viktoríu Bretlandsdrottningu til Rutherford B. Heyes árið 1880, en það var smíðað úr timbri breska skipsins HMS Resolute.

„Resolute-skrifborðið er fallegt,“ sagði Trump. „Ronald Reagan notaði það, aðrir notuðu það.

Í grein NYT segir að Trump hafi síðan kvartað yfir því Biden hafi notað það.

„Hann notar það. Ég nota það kannski ekki næst. Það hefur verið saurgað og ég meina það bókstaflega,“ sagði Trump og tóku gestir sem blaðamenn NYT ræddu við ummælunum þannig að Trump hefði gefið í skin að Biden hefði skitið á borðið.