Trump lætur reyna á þagnarskylduna

Í færslu sem hann birti á samfélagsmiðli sínum, Truth Social, í gær fór Trupm hörðum orðum um Michael Cohen, fyrrverandi einkalögmann hans til langs tíma, og Stormy Daniels, fyrrverandi klámmyndaleikkonu og leikstjóra.

Kallaði hann þau drulludela og sagði að „lygar þeirra og dylgjur“ hefðu kostað Bandaríkin mikið. Þetta sagði hann þegar hann teildi færslu frá Michael Aventatti, fyrrverandi lögmanni Daniels, sem hefur verið dæmdur fyrir fjárkúgun og fjárdrátt, svo eitthvað sé nefnt.

Umrætt dómsmál er eitt af fjórum dómsmálum gegn Trump og snýr í stuttu máli sagt að því þegar Cohen greiddi Daniels 130 þúsund dali skömmu fyrir forsetakosningarnar 2016. Greiðslunni var ætlað að koma í veg fyrir að Daniels segði frá meintu framhjáhaldi Trumps með henni á árum áður.

Trump endurgreiddi Cohen en þær greiðslur voru skráðar í bókhald forsetans fyrrverandi sem lögfræðikostnaður og er hann sakaður um að hafa falsað skjöl í 34 liðum. Verði hann dæmdur sekur gæti hann verið dæmdur til allt að fjögurra ára fangelsisvistar.

Réttarhöldin eiga að hefjast þann 15. apríl, þegar kviðdómendaval hefst.

Juan M. Merchan, dómarinn í málinu, múlbatt Trump fyrst í mars og herti úrskurð sinn svo í upphaf apríl. Upprunalega bannaði dómarinn Trump að tjá sig um vitni, kviðdómendur og aðra sem tengjast réttarhöldunum en bætti svo dóttur sinni við listann, þar sem Trump hafði farið með falskar yfirlýsingar um hana á Truth Social.

Skipun Merchans fór ekki nákvæmlega út í það hvurslags ummæli Trump var bannað láta frá sér um vitni í málinu að öðru leyti en að hann mætti ekki fjalla um aðkomu þeirra að rannsókn málsins eða réttarhöldunum, samkvæmt frétt AP fréttaveitunnar.

Ekki er ljóst hvort Merhcan muni bregðast við ummælunum og þá hvernig en bæði Cohen og Daniels eru talin líkleg til að bera vitni við réttarhöldin þar sem þau hafa bæði umfangsmikla aðkomu að því.

Einn sérfræðingur sem blaðamenn AP ræddu við telur að Trump muni halda því fram að hann hafi ekki verið að tjá sig um aðkomu þeirra að réttarhöldunum heldur þeirra persónur. Annar sagði þó að með ummælunum væri Trump að kalla tvö möguleg vitni gegn sér lygara og það væri nákvæmlega það sem dómarinn hefði viljað koma í veg fyrir.

Markmiðið væri að reyna að koma í veg fyrir möguleg áhrif á kviðdómendur í málinu.

Daniels hefur áður sagt að hún hafi orðið fyrir áreiti frá stuðningsmönnum Trumps og sakað hann um að eggja þá áfram.

Aldrei refsað fyrir hörð ummæli

Fjölmargar færslur Trumps á Truth Social fjalla um „spillta“ saksóknara og það að dómsmálaráðuneyti Bandaríkjanna hafi verið vopnvætt gegn Trump. Hann varpar frá sér sambærilegum ummælum í öllum ræðum sem hann heldur og í mörgum viðtölum.

Hann hefur talað illa um dómara, fjölskyldumeðlimi þeirra og fjölmarga aðra en honum hefur þó aldrei verið refsað af dómurum vegna þessara ummæla.

Í frétt Politico er vísað til annars manns sem heitir Donald en hann stóð fyrir um fimmtán árum frammi fyrir ákærum í Texas. Hann sat í borgarstjórn Dallas og var sakaður um mútuþægni. Skömmu fyrir réttarhöldin fór Donald Hill í sjónvarpsviðtal þar sem hann gagnrýndi málaferlin, sagði ákærurnar gegn sér innihaldslausar og sagði málaferlin pólitísks eðlis.

Honum var snarlega refsað af dómaranum í málinu fyrir að reyna að hafa áhrif á kviðdómendur, dæmdi hann fyrir að vanvirða réttinn og skikkaði hann í þrjátíu daga fangelsi fyrir að brjóta gegn þagnarskyldu.

Eins og fram kemur í grein Politico eru ummæli Trumps ítrekað mun alvarlegri en ummæli Hills en dómarar hafa aldrei gripið til aðgerða gegn honum. Í greininni eru dregnar líkur að því að ekki nokkur annar Bandaríkjamaður hefði fengið jafn mikið svigrúm og Trump og er vísað til þess að dómarar óttist mögulega að virðast reyna að hafa áhrif á forsetakosningarnar í nóvember.