Segir fjár­mála­ráð­herra ekki kunna að reikna

Hörð orðaskipti fóru þeirra á milli og sakaði Jóhann Páll Sigurð Inga um að kunna ekki að reikna. Sigurður Ingi sagði á móti að hann væri í það minnsta ekki einn af þeim sem allt vissu, og mátti greina hæðnistón og titring í röddu Sigurðar þegar hann sagði:

„Það er af fullkomnu lítillæti að ég þykist ekki vera bestur í stærðfræði í heimi.“

Ásökunin um að ráðherra kynni ekki að reikna var hins vegar sett fram í samhengi við annað mál sem einnig hefur verið rætt í þingsal. 

Í fyrirspurninni vildi Jóhann Páll vita um aðgerð sem finna má í fjárlagafrumvarpi ríkisstjórnarinnar sem hann segir jafngilda skerðingu á lífeyrisréttindum fólks sem hefur unnið slítandi störf og því örorkutíðni mikil.

„Þarna fann ríkisstjórnin vasana til að seilast ofan í, þarna á aðhaldið að lenda samkvæmt stefnu þessarar ríkisstjórnar.“

Þetta gat ríkisstjórnin komið sér saman um

Jóhann Páll sagði ríkisstjórnina ekki treysta sér að taka á sóun í ríkisrekstri né að laga skattkerfið svo ríkasta eina prósentið á Íslandi greiði, þótt ekki væri nema sama hlutfall í skatt og almennt launafólk.

„Það má ekki nei – en það hlýtur að vera hægt, hugsar ríkisstjórnin, að kreista nokkra milljarða út úr lífeyrisþegum sem hafa unnið líkamlega og andlega krefjandi vinnu, fólkinu sem hefur greitt í sjóði eins og Gildi, Stapa, Festu, Lífeyrissjóð Rangæinga og Lífeyrissjóð Vestmannaeyja. Ríkisstjórnarflokkarnir þrír, Framsókn, VG, Sjálfstæðisflokkur, þau takast á um hitt og þetta, en hér er aðgerð sem þau gátu komið sér saman um,“ sagði þingmaðurinn hæðnislega.

Jóhann Páll hélt áfram og sagði að ef jöfnunarframlag ríkisins til lífeyrissjóða falli niður að fullu eins og ríkisstjórnin leggi til, þá verða lífeyrisgreiðslur hjá Gildi að meðaltali 30 þúsund krónum lægri á mánuði en hjá öðrum sjóðum. Hann spurði Sigurð Inga hvort honum þætti þetta réttlát niðurstaða?

„Getur hæstvirtur ráðherra horft framan í verkafólk í landinu, getur hæstvirtur ráðherra horft framan í láglaunafólk og útskýrt hvers vegna fólkið sem hefur fyrst og fremst unnið erfiðisvinnu eigi að njóta miklu lakari lífeyrisréttinda heldur en annað launafólk?“

Allt rangt sem þingmaðurinn sagði

Sigurður Ingi sagði á misskilningi byggt. „Ég held að það hafi nánast allt verið rangt sem háttvirtur þingmaður sagði.“ 

Þó væri rétt að nokkrir sjóðir væru þar sem örorkubirgðin væri meiri. Sigurður Ingi sagði beint framlag úr ríkissjóði ekki lausnina þegar um væri að ræða sjóði sem hefðu úr 8 þúsund milljörðum að spila, það væru djúpir vasar og nú væri að hugsa upp nýtt kerfi. Það samtal væri hafið. Tryggt verði að sjóðirnir sem væru með aukna byrgði yrðu ekki fyrir skerðingu.

Jóhann Páll sagði ótrúlegt að verða vitni af þessu. Þetta er sami ráðherra og kom í síðustu viku og í fjarlagafrumvarpinu sínu fullyrðrði ranglega að verið væri að færa eldri borgum kjarabót upp á 138 þúsund króna.

„Nokkuð sem hver sem skilur skerðingareglur almannatryggingarkerfisins veit að er rangt. Þetta er ráðherra sem kann ekki að reikna,“ sagði Jóhann Páll og var hinn æstasti. Sagði að ekki stæði steinn yfir steini hjá ráðherra og svo komi hann upp í pontu með hroka og láti eins og um sé að ræða ofboðslega ómálefnalega umræðu. „Hvers vegna vill ríkisstjórnin auka þennan mun enn frekar?“

Hvar er reiknivilla Sigurðar Inga?

Jóhann Páll viðurkennir, í stuttu samtali við fréttastofu, hann vissulega hafa sakað fjármálaráherra um að hafa sakað fjármálaráðherra um að vera ekki alltof sleipur með reiknistokkinn. En hann var beðinn um að skýra þetta nánar.

„Já, ég sagði þetta víst. Þetta er hart. En Í greinargerð fjárlagafrumvarps ríkisstjórnarinnar, og sjá má á blaðsíðu 38, er því haldið fram að 11.500 króna hækkun frítekjumarks eldra fólks skili eldra fólki 11.500 króna kjarabót á mánuði eða 138 þúsund króna kjarabót yfir árið.“

Jóhann fullyrðir að hækkunin skili flestu eldra fólki 5.200 króna kjarabót á mánuði eða 3.500 krónum eftir skatt sem þýðir 42 þúsund krónur yfir árið). 

„Við framsetninguna hefur ráðherra hins vegar láðst að taka tillit til þess að hækkun frítekjumarks um 11.500 krónur þýðir í raun að 11.500 króna lífeyrissjóðstekjur, sem áður ollu skerðingu á greiðslum Tryggingastofnunar upp á 5.175 krónur í 45 prósenta skerðingarhlutfalli, hætta að gera það.“