Manneskja með von á bak­við hverja einustu um­sókn

Þetta er meðal þess sem fram kemur í aðsendri grein á Vísi. Valgerður Rut Jakobsdóttir sérfræðingur hjá Vinnumálastofnun lýsir því þar að í starfi sínu hjá stofnuninni hitti hún reglulega fólk sem sé í atvinnuleit. Margvíslegar ástæður séu þar að baki, sumir misst starf sitt óvænt, aðrir í tímabundinni stöðu eða ákveðið að leita á ný mið og svo séu þeir sem aldrei hafi áður unnið á íslenskum vinnumarkaði en vilji gjarnan komast í starf sem allra fyrst.

Manneskja með vonir á bakvið hverja einustu umsókn

Valgerður bendir á að það sé fyrirtækjum og vinnuveitendum í hag að fólk í atvinnuleit sæki um starf hjá þeim. Það hljóti að vera eftirsóknarvert að hafa úr allskonar umsækjendum að velja.

„Mikilvægt að hafa alltaf í huga að á bak við hverja og eina starfsumsókn er manneskja sem hefur lagt vinnu og hugsun í sína atvinnuumsókn. Það felst ákveðin berskjöldun í því að treysta fólki fyrir sínum persónulegu upplýsingum og eftir að umsóknin er lögð inn hefst ákveðið tímabil vonar og væntinga hjá fólki.“

Atvinnuleysi eitt og sér geti haft mikil áhrif á sjálfstraustið, sem geti farið dvínandi eftir því sem líði á og ekkert breytist. Þetta geti hent hvern sem er, atvinnuleysið spyrji ekki um stöðu, menntun né starfsreynslu.

Umsóknir geti verið allskonar

„Reynsla mín eftir fjöldann allan af viðtölum við fólk er sú að margir greina frá því að atvinnuleitin sé orðin þeim ansi þungbær, og stór hluti ástæðunnar sé skortur á viðbrögðum atvinnurekenda við starfsumsóknum þeirra. Fólk greinir frá vonleysi og eins og gefur að skilja getur þetta haft í för með sér mikla höfnunartilfinningu.“

Valgerður segist því biðla til atvinnurekenda um að taka þetta til umhugsunar og svara öllum atvinnuumsóknum sem þeim berast. Umsóknirnar geti verið allskonar, með eða án ferilskrár, með góðum og ekki jafn góðum ferilskrám, á íslensku eða ensku og lengi mætti telja.

„Það sem er sammerkt með þessum umsóknum er manneskjan á bakvið þær, sem bíður og vonast eftir svari. Svarið þarf ekki að vera ítarlegt, en það er hægt að semja staðlað svar sem hægt er að nota að hverju sinni. Í svarinu væri fólk upplýst um að umsókn sé móttekin og þeim í leiðinni þakkað fyrir sýndan áhuga á því að starfa hjá fyrirtækinu. Einnig kæmi fram hver staða fyrirtækisins væri, hvort ekki sé verið að ráða inn að svo stöddu eða að ráðning hafi nú þegar átt sér stað. Svörin þjóna ákveðnum tilgangi, að gefa væntingum og voninni svör, þrátt fyrir að svarið hafi ekki verið „já, þú fékkst starfið.“