Innlent

Brjálaðist út í barn í bíó

Jón Þór Stefánsson skrifar
Atvikið sem málið varðar átti sér stað í Kringlubíó.
Atvikið sem málið varðar átti sér stað í Kringlubíó. Vísir/Vilhelm

Karlmaður hefur verið dæmdur í þrjátíu daga fangelsi, skilorðsbundið til tveggja ára, fyrir líkamsárás og brot gegn barnaverndarlögum vegna atviks sem átti sér stað í bíósal í júlí á þessu ári, nánar tiltekið í Sambíóunum í Kringlunni.

Maðurinn var ákærður fyrir að veitast að ungum dreng með því að taka í hálsmál peysu hans, toga hann að sér, með þeim afleiðingum að drengurinn rakst í sæti. Síðan hafi hann sleppt honum aftur í sætið þannig að drengurinn hlaut mar á höfði, handlegg og læri.

Í ákærunni segir að með þessu hafi maðurinn ógnað drengnum og sýnt honum vanvirðandi háttsemi, yfirgang og ruddalegt athæfi.

Í upprunalegri ákæru málsins, sem ákæruvaldið gerði breytingar á, sagði að maðurinn hefði jafnframt öskrað á drenginn að hann skyldi þegja.

Maðurinn játaði brot sitt og var því sakfelldur samkvæmt ákæru. Líkt og áður segir hlaut hann þrjátíu daga skilorðsbundinn dóm. Þá er honum gert að greiða drengnum 250 þúsund krónur.

Dómsmál Bíó og sjónvarp Reykjavík Kvikmyndahús Ofbeldi gegn börnum

Mest lesið


Fleiri fréttir

Sjá meira


×

Mest lesið