Sekta TikTok um tæpa átta­tíu milljarða

Fyrirtækið er einnig sakað um skort á gagnsæi gagnvart notendum og notkun á upplýsingum þeirra. Sektin samsvarar gróflega um 77,3 milljörðum króna og byggir á persónuverndarlögum ESB sem kallast Digital Markets Act.

Samkvæmt frétt Politico er þetta þriðja hæsta sekt sem beitt er á grunni þessara laga.

Sjá einnig: ESB sektar Apple og Meta um rúma hundrað milljarða

Höfuðstöðvar TikTok í Evrópu eru í Írlandi og því er málið á höndum yfirvalda þar. Áðurnefnd persónuverndarstofnun (DPC) segja að þegar persónuupplýsingarnar voru sendar til Kína hafi forsvarsmenn TikTok ekki gengið úr skugga um að þau endi ekki í höndum yfirvalda í Kína.

Fyrirtækinu hefur verið gert að hætta að flytja persónuupplýsingar um evrópska notendur til Kína innan sex mánaða, geti það ekki tryggt að þar njóti gögnin sömu verndar og í Evrópu.

Forsvarsmenn TikTok hafa hafnað þessum ásökunum og segjast ætla að áfrýja úrskurðinum. Þeir hafa ávallt hafnað því að persónuupplýsingar notenda í Norður-Ameríku og Evrópu séu geymdar á vefþjónum í Kína en viðurkenndu í apríl að í febrúar hefði komið í ljós að það hefði verið gert við „takmarkað magn“ gagna. Þá var því einnig haldið fram að gögnunum hefði verið eytt þegar þau uppgötvuðust.

Fyrirtækið segist aldrei hafa afhent yfirvöldum í Kína gögn um notendur og að krafa um slíkt hafi aldrei borist.

Líka undir pressu í Bandaríkjunum

Rekstur TikTok í Bandaríkjunum hefur verið vandræðamikill á undanförnum árum. Donald Trump, forseti, gaf árið 2020 út forsetatilskipun um að loka ætti á aðgengi fólks að samfélagsmiðlinum þar í landi en hún var felld úr gildi af dómstólum.

Í kjölfar þess tóku þingmenn höndum saman og samþykktu lög um að samfélagsmiðlinum yrði lokað, ef hann yrði ekki seldur til bandarískra aðila.

Joe Biden, fyrrverandi forseti Bandaríkjanna, skrifaði undir lögin síðasta vor en þau nutu mikils stuðnings þingmanna beggja flokka vestanhafs. Bandaríkjamenn hafa áhyggjur af því að ógn stafi af TikTok vegna þeirra valda sem Kommúnistaflokkur Kína hefur gegn fyrirtækjum þar. Þau lög voru svo staðfest af hæstarétti.

Trump hefur þó snúist hugur og hafa átt sér stað viðræður um að selja fyrirtækið. Forsetinn hefur frestað gildistöku bannsins á TikTok, þó óljóst sé hvort hann hafi yfir höfuð vald til þess. Þingmenn hafa þó ekki látið reyna á það.