Frá­bær þjóðbúningamessa í Fljóts­hlíð

Hér erum við að tala um Breiðabólsstaðarkirkju, mjög fallega kirkju í Fljótshlíð þar sem séra Kristján Arason er prestur. Fólk streymdi til messunnar, sem hófst klukkan 11:00, allir meira og minna í þjóðbúningum, karlar, konur og börn. Heiðurinn af framtakinu eiga þær Sigurbjörg Fríða og Ragnhildur Birna, enda miklar þjóðbúningakonur, sem sauma og sauma þjóðbúninga.

„Það er bara svo gaman að sjá hvað það eru margir að mæta ef þið sjáið hérna í kring, það er bara æðislegt. Og gaman að sjá hvað margir eru uppáklæddir, það gleður okkur,“ segir Sigurbjörg Fríða.

Þannig að flestir af þessum búningum eru saumaðir og hannaðir af fólkinu hérna á staðnum?

„Já, það má segja það,“ segir Ragnhildur Birna eða Ranka eins og hún er alltaf kölluð.

En að sauma þjóðbúning, er það ekkert mál eða er það mikið mál?

„Það er svona skemmtilegt hugðarefni, það er mjög, mjög skemmtilegt, þetta er svona jóga,“ segir Ranka og skellihlær.

Maður sér að meira að segja að karlarnir eru í búningum og eru meira að segja flottir, eruð þið ekki sammála því ?

„Jú, finnst þér þeir ekki flottir, þeir eru alveg geggjaðir,“ segir Sigurbjörg Fríða.

En eigum við að nota þjóðbúninga meira eða hvað?

„Klárlega, ekki spurning og við bara öll tækifæri. Skírnir, fermingar, giftingar og fleira,“ segir Ranka.

En þeir sem segja, það er svo „asnalegt“ að vera í þessu. Hvað segið þið við þá ?

„Finnst ykkur við asnalegar? Ha, erum við ekki glæsilegar“, segir Sigurbjörg Fríða hlæjandi.

„já, þið eruð frábærar, takk fyrir kærlega,“ segir fréttamaður.