Viðskipti innlent

Skilur ekkert í stjórn­völdum að hafa ekki stöðvað „græðgisvæðingu“ í bílastæðamálum

Margrét Helga Erlingsdóttir skrifar
Runólfur Ólafsson framkvæmdastjóri FIB bindur vonir við að núverandi ráðherra neytendamála geri sanngjarnar leikreglur um gjaldtöku á bílastæðum í ljósi þess að ráðherrann sjálfur hafi slæma reynslu og fengið rukkanir í heimabankann sem voru i engu samræmi við grunngjald bílastæðisins.
Runólfur Ólafsson framkvæmdastjóri FIB bindur vonir við að núverandi ráðherra neytendamála geri sanngjarnar leikreglur um gjaldtöku á bílastæðum í ljósi þess að ráðherrann sjálfur hafi slæma reynslu og fengið rukkanir í heimabankann sem voru i engu samræmi við grunngjald bílastæðisins. Vísir

Framkvæmdastjóri Félags íslenskra bifreiðaeigenda segir gullgrafaræði skýra þá þróun sem hefur verið í bílastæðamálum og segir hana græðgisvæðingu sem hafi fengið að ganga allt of langt. Hann skilur ekkert í stjórnvöldum að hafa ekki stigið fastar niður nú þegar.

Fréttastofa ræddi í kvöldfréttum við forstjóra Neytendastofu sem sagði að kvartanir vegna bílastæðamála séu daglegt brauð hjá stofnuninni. Þetta sé raunin þrátt fyrir að hafa í byrjun júní sektað fimm bílastæðafyrirtæki vegna brota gegn lögum um góða viðskiptahætti og reglum um verðmerkingar.

Guðmundur Snorrason, endurskoðandi, sagði í samtali við fréttastofu í morgun farir sínar ekki sléttar eftir að hafa lagt í stæði Green Parking í Hörpu í lok júlí. Hann lagði í stæðið í hálftíma en fékk rukkun í heimabanka upp á 4260. Viðverugjaldið eru 510 krónur en vangreiðslugjaldið nam 3.750 kr. Vangreiðslugjaldið kom Guðmundi í opna skjöldu og ákvað hann að leita til Félags íslenskra bifreiðaeigenda vegna málsins. Runólfur Ólafsson er framkvæmdastjóri félagsins.

Mér skilst að Guðmundur sé ekki sá eini sem hefur leitað til ykkar vegna bílastæðamála?

„Nei, við höfum fengið mjög mörg tilvik og fórum fyrst að beina sjónum okkar sérstaklega að þessum málum fyrir liðlega 2 árum fyrst og svo síðastliðið vor þá kærðum við nú fyrirtækin fyrir óeðlilegar merkingar og óeðlilega viðskiptahætti og annað í þeim dúr og kvörtuðum yfir að þarna væri græðgisvæðing sem hefði gengið allt of langt og það þyrfti að setja reglur.“

Runólfur fundaði um málið með síðustu ríkisstjórn en hann bindur vonir við að neytendaráðherra geri eitthvað í málinu en í samtali við fréttastofu sagðist ráðherrann hafa lent í þessu sama.

„Einhvern veginn virðast allir vita af vandamálinu og sem betur fer má segja hefur orðið vakning hjá neytendamálaráðherra þegar hún fékk rukkun á sig núna nýlega og þetta er auðvitað bara einhvers konar ástand sem er ekki bjóðandi almenningi og ég skil ekkert í stjórnvöldum að hafa ekki stigið fastar niður þegar.“

Systursamtök FÍB í öðrum löndum hafa haft samband við FÍB vegna skjólstæðinga sem leitað höfðu til þeirra til vegna himinhárra sekta sem birtust í heimabankanum þeirra þegar þeir voru á ferðalagi um Ísland.

Gjaldtakan dragbítur fyrir fjölskyldur að skoða landið sitt

„Það er svo víða sem pottur er brotinn en þetta virðist vera ákveðið gullgrafaræði því það hafa fleiri farið af stað og stundað þetta, því miður,“ segir Runólfur sem bendir á að þessi þróun hafi ekki aðeins áhrif á þá ferðamenn sem sækja landið heim heldur líka heimamenn sem vilja njóta náttúrunnar.

„Það er með ólíkindum hvað gjaldtökustæðum úti á landi hefur fjölgað, víða eru þetta bara malarplön og þú kemur á stæði og það skiptir ekki máli hvort þú stoppar þar í fimm mínútur eða einn sólarhring, það er þúsund krónur og þetta er orðinn dragbítur fyrir venjulegt fjölskyldufólk á Íslandi að fara um landið með börnin og sýna þeim einhverja svona náttúruvæna staði sem við viljum kynnast á lífsleiðinni.“

Bílastæði Ferðalög Ferðaþjónusta Fjármál heimilisins

Tengdar fréttir

Kvartanir vegna bílastæðamála daglegt brauð hjá Neytendastofu

Ekki líður dagur án þess að Neytendastofu berist kvartanir vegna bílastæðamála, þrátt fyrir að hafa sektað nokkur fyrirtæki og birt ákvarðanir. Forstjórinn segir landslagið gjörbreytt frá því sem var og útlit sé fyrir að vandinn sé að aukast. 

Þurfti rannsóknarvinnu til að finna upplýsingar um bílastæðarukkun

Hanna Katrín Friðriksson, atvinnuvegaráðherra og ráðherra neytendamála, segist ítrekað hafa lent í því að fá rukkun inn á heimabanka frá bílastæðafyrirtækjum sem hún viti ekki hvernig sé tilkomin, líkt og fjölmargir landsmenn. Hanna greindi frá þessu í Hádegisfréttum Bylgjunnar.

Rukkuð um sex þúsund kall eftir lagningu á Snæfellsnesi

Fjölskylda í Grafarvogi fékk rukkun upp á tæplega sex þúsund krónur eftir að hafa lagt á bílastæði við Kirkjufell á Snæfellsnesi. Ráðherra segir fjölskylduna ekki hafa áttað sig á því að gjaldskylda væri á bílastæðinu.



Mest lesið


Fleiri fréttir

Sjá meira


×

Mest lesið