Svona verður dag­skráin á Menningar­nótt

Menningarnótt verður sett klukkan hálf eitt á laugardag á tröppum Þjóðleikhússins, sem fagnar 75 ára afmæli í ár. Heiða Björg Hilmisdóttir, borgarstjóri, setur hátíðina formlegu og hyggst Logi Einarsson, menningarmálaráðherra, halda afmælisræðu. 

Vinsælar persónur úr heimi leikhússins bregða á leik, til dæmis Lína Langsokkur og Elsa og Ólafur úr Frosti. Íbúar Kardemommubæjar verða einnig á staðnum, þar á meðal Bastían bæjarfógeti, Ræningjarnir og Soffía frænka, og vinsælustu íbúarnir í Hálsaskógi, Mikki og Lilli klifurmús. Þjóðleikhúsið fagnar afmælinu með stæl og verður dagskrá fyrir alla fjölskylduna í boði. Vegfarendur geta til að mynda kíkt á spunamaraþon Improv Íslands í kjallara leikhússins eða fengið að sjá brot úr sýningunni um Línu Langsokk. 

Færeyingar eru heiðursgestir hátíðarinnar í ár. Fulltrúar þeirra ætla að sjá um menningar- og skemmtidagskrá í ráðhúsinu líkt og tónlist, myndlist og veitingar að þeirra hætti. Kíkja má á Færeyingana í Ráðhúsi Reykjavíkur en einnig verður fjölbreytt gjaldfrjáls dagskrá í boði á Listasafni Reykjavíkur og Borgarsögusafni.

Einnig verður haldið bekkpressumót fyrir utan Kjarvalsstaði.

Tónlistarfólk stígur á stokk

Tónlistaratriði skipa alltaf stóran sess í dagskrá Menningarnætur. Hið árlega Tónaflóð Rásar 2 verður á sínum stað á Arnarhóli þar sem meðal annars Geðbrigði, Retro Stefson, VÆB og Emmsjé Gauti stíga á stokk. 

Menningarnæturtónleikar Bylgjunnar verða í Hjólmskálagarðinum líkt og fyrri ár. Þar ætla Skítamórall, Herra Hnetusmjör og GDRN að skemmta lýðnum en stórhljómsveitin Nýdönsk stígur síðust á svið.

Moment DJ Margeirs verður svo á Klapparstíg þar sem boðið verður upp á dynjandi tónlist og stuð.

Ítarlegri dagskrá má nálgast á menningarnott.is. 

Einnar mínútu þögn

Menningarnótt lýkur klukkustund fyrr en áður, eða klukkan tíu, með árlegu flugeldasýningunni. 

„Þessi breyting er til að undirstrika að þetta er fjölskylduhátíð þar sem lögð er áhersla á að fjölskyldan komi saman í miðborginni og fjölskyldan fari saman heim,“ segir í tilkynningu frá Reykjavíkurborg.

 „Við hvetjum öll til að vera klár almennt í lífinu. Taka góðar ákvarðanir og hugsa um hvert annað. Við berum öll ábyrgð hvert á öðru og að öllum líði vel.“

Flugeldasýningin í ár er tileinkuð Bryndísi Klöru Birgisdóttur, sem lést eftir stunguárás á Menningarnótt í fyrra. Fyrir sýninguna verður Bryndísar Klöru minnst með einnar mínútu þögn á Arnarhóli.

Götulokanir og strætóskutlur

Miðborgin verður lokuð fyrir akandi umferð meðan á hátíðinni stendur. Klukkan tólf á hádegi á fimmtudag verður Kalkofnsvegi lokað, á milli Hverfigötu og Geirsgötu, til að hægt sé að setja upp sviðið á Arnarhóli. Strætisvagnar sem venjulega keyra þar um fara hjáleið.

Klukkan fjögur síðdegis á föstudag verður Sóleyjargötu, Fríkirkjuvegi og Lækjargötu lokað vegna undirbúnings Reykjavíkurmaraþonsins. Götulokanirnar vara fram yfir Menningarnótt.

Strætóskutlum verður ekið til og frá bílastæðum við Laugardalshöll um Borgartún að Hallgrímskirkju með stoppi á Hlemm á milli klukkan hálf átta að morgni til korter yfir ellefu á laugardagskvöld. Þá verður einungis hægt að leggja rafskútum á ákveðnum svæðum í jaðri hátíðarsvæðisins.