Fram­tíð Ísraela í Euro­vision á­kveðin í nóvember

Þetta kemur fram í tilkynningu frá samtökunum. Líkt og fram hefur komið hefur mikinn styr staðið um þátttöku Ísraela í keppninni vegna hernaðar þeirra á Gasa. Nokkrar þjóðir hafa tilkynnt að þær muni ekki taka þátt verði Ísrael með í keppninni, þjóðir á borð við Spán, Slóveníu, Írland og Holland. RÚV hefur auk þess gert fyrirvara við þátttöku.

Í bréfi Delphine Ernotte-Cunci, forseta EBU, til aðildarþjóða segir að fordæmalaus skoðanaskipti hafi átt sér stað innan samtakanna um þátttöku Ísraels í Eurovision. Því þurfi að finna lausn á deilunni á lýðræðislegan hátt.

Eina málið á dagskrá á hinu boðaða aukaþingi er atkvæðagreiðslan. Stefnt er að því að það fari fram fyrri hluta nóvember.

Hingað til hafi aðild að EBU tryggt þjóðum rétt til að taka þátt í keppninni. Verði Ísrael meinuð þátttaka verði sett sögulegt fordæmi sem geti haft áhrif á það hvernig unnið verður úr sambærilegum málum í framtíðinni, að því er segir í tilkynningunni.