Dramatík í víðavangshlaupinu: Þor­steinn dæmdur úr leik fyrir að hrinda Arnari

Arnar kom fyrstur í mark í hlaupinu í dag en Þorsteinn annar. Til orðaskipta kom á milli þeirra á lokasprettinum eins og sjá má á Instagram-síðu hlaðvarpsins Langa.

Í samtali við Vísi segir Þorsteinn að hann hafi verið réttilega dæmdur úr leik.

„Það var smá hasar í þessu. Ég var búinn að leiða í smá tíma og Arnar var á eftir mér. Hann var það nálægt mér að hann sparkaði undir sólann á mér í þrígang í hlaupinu,“ sagði Þorsteinn.

„Þetta gerist ítrekað í hlaupum þar sem hann er á eftir mér. Ég er búinn að vera smá pirraður á þessu undanfarið. Ég skammaði hann hressilega í fyrsta sinn og bað hann um að hætta þessu. Svo gerðist þetta aftur og ég missti hausinn í lokin.“

Þorsteinn segist ekki vera stoltur af viðbrögðum sínum.

„Ég var búinn að fá nóg, hraunaði yfir hann, stuggaði við honum og var réttilega dæmdur úr leik,“ sagði Þorsteinn.

„Arnar kærði mig fyrir að ýta honum og það má ekki. Ég var því dæmdur úr leik. Arnar vann þetta. Hann var sterkari í dag og varð Íslandsmeistari.“

Eftir að Þorsteinn var dæmdur úr leik færðist Jökull Bjarkason upp í 2. sætið og Stefán Pálsson í það þriðja.

Þorsteinn sagði að mælirinn hefði orðið fullur hjá sér í dag.

„Þetta hefur gerst undanfarið í hlaupum þar sem hann er á eftir mér og ég er að leiða. Þetta gerist reglulega, hvort sem það er óvart eða ekki, á ekki að sparka undir sólann á næsta manni,“ sagði Þorsteinn. 

„Ég er frekar umburðarlyndur maður þannig að ég hef ekkert verið að skamma hann mikið en ég er kominn með nóg af því, hann hætti ekki og svo missti ég hausinn.“

Arnar kom í mark á tímanum 31:32 mínútum en Jökull á 31:57 mínútum og Stefán á 32:37 mínútum.

Úrslit hlaupsins má sjá með því að smella hér.