Milljónir í sekt fyrir að bakka á konu

Þann 15. mars 2024 fékk lögreglan tilkynningu um að ekið hefði verið yfir konu í Lóuhólum í Breiðholti. Er hana bar að garði var konan enn undir bílnum en hún var síðan flutt á sjúkrahús.

Vitni gaf sig fram við lögreglu og sagði ökumanninn hafa bakkað þvert yfir bílastæðið og hafnað á konunni, sem barði ítrekað í afturrúðu bílsins. Hún datt síðan og fóru tvö afturdekk bílsins yfir hana. Að sögn vitnisins stoppaði ökumaðurinn ekki fyrr en honum var gert vart við að eitthvað væri ekki með felldu. 

Ökumaðurinn sagði hins vegar að hann hefði litið í baksýnisspeglana og ekki ekið hratt, einungis um tíu kílómetra á klukkustund. Síðan hafi hann heyrt dynk og stöðvað bílinn samstundis. 

Í kjölfarið var konan flutt á sjúkrahús og endaði með að þurfa að liggja inni á sjúkrahúsi í fimm mánuði. Hún var með fjórtán brotin rifbein, missti málið í þrjá mánuði, missti heyrn, fór tvisvar sinnum í hjartastopp og gat ekki gengið fyrr en hún komst í endurhæfingarmeðferð á Grensás.

Ók tvo metra með konuna undir bílnum

Fyrir dómi höfðu ökumaðurinn og vitnið sömu sögu að segja. Ökumaðurinn neitaði sök og taldi ekki hafa sýnt af sér gáleysi við aksturinn. Vitnið taldi hins vegar að maðurinn hefði ekki fylgst nægilega vel með og eftir að konan lenti undir bílnum hafi hann keyrt áfram tvo metra áður en hann stöðvaði bílinn.

Fyrir dómi sagðist konan ekki muna eftir atburðarásinni og sagði að allt hafi liðið mjög hratt. Hún hafi orðið undir bílnum og svo var hún allt í einu komin upp á sjúkrahús. Fyrir lá upptaka af atburðinum en hún fraus í nokkrar sekúndur en akkúrat þá keyrði maðurinn yfir konuna. 

Dómurinn var með framburð allra til hliðsjónar en töldu að þegar litið væri heildstætt á atvikið með hliðsjón af aðstæðum á vettvangi að ökumaðurinn hafi sýnt af sér gáleysi. Hann hafi ekki gætt nægilega að sér og stoppaði ekki bílinn þegar hann heyrði dynkinn þegar hann bakkaði á konuna. 

Konan krafðist fimm milljóna en taldi dómurinn að hæfileg upphæð miskabóta væru 3,5 milljónir króna. Hann þarf einnig að greiða laun verjanda síns og skipaðs réttargæslumanns konunnar. Þá var hann dæmdur í þrjátíu daga skilorðsbundið fangelsi.