Veittu öku­manni eftir­för sem endaði á ljósa­staur

Á meðfylgjandi mynd má sjá hvar bíllinn lenti á ljósastaur og viðbragðsaðila að störfum á vettvangi en lögreglan var við eftirlit þegar hún hugðist stöðva ökumanninn sem virti beiðni þar um að vettugi. 

Fréttamaður Sýnar náði jafnframt meðfylgjandi myndskeiði af eftirleiknum.

„Þetta var ökumaður á fólksbifreið sem virti ekki stöðvunarmerki lögreglu. Honum var veitt eftirför og bifreiðin endaði þarna á ljósastaur. Hann var síðan handtekinn og færður á lögreglustöð,“ segir Árni Friðleifsson, aðstoðaryfirlögregluþjónn hjá lögreglunni á höfuðborgarsvæðinu.

Ekki virðist sem viðkomandi hafi verið mikið slasaður enda var ekki kallað eftir sjúkrabíl á vettvang, en bíllinn hafnaði á ljósastaur við aðreinina af Reykjanesbraut og upp í Ártúnsbrekku. Að öðru leyti kveðst Árni ekki geta veitt frekari upplýsingar um málið að svo stöddu.

Fréttin hefur verið uppfærð með myndskeiði sem sýnir eftirför lögreglu.