Finnur vill odd­vitasæti VG í Reykja­vík og bjóða fram með öðrum flokkum

Í framboðstilkynningu kemur fram að Finnur hafi starfað á sviði umhverfismála undanfarin ár, meðal annars sem forseti Ungra umhverfissinna, sérfræðingur í umhverfis- og loftslagsmálum hjá Landgræðslunni, hjá Umhverfisstofnun og Sambandi íslenskra sveitarfélaga.

„Ég vil að við byggjum græna, mannvæna og örugga borg. Við þurfum að halda áfram að þétta, en það má ekki vera á kostnað grænna svæða, ljósvistar eða annarra nauðsynlegra gæða sem við þurfum á að halda til að líða vel. Samtímis þurfum við að fara í öflugt átak í vernd og endurheimt vistkerfa, sérstaklega votlendis,“ segir Finnur í yfirlýsingu og heldur áfram:

„Ég vil að við byggjum húsnæði fyrir fólk en ekki fjárfesta. Uppbygging þarf að vera á forsendum fólksins. Við þurfum húsnæði á viðráðanlegu verði sem tekur tillit til grænna svæða, almenningssamgangna og annarra aðstæðna á hverjum stað.“

Tryggja eigi öryggi gangandi og hjólandi borgarbúa með bættri lýsingu, rauðmáluðum hjólastígum, betri aðskilnaði hjólastíga frá bílaumferð og lægri hámarkshraða á völdum svæðum. Finnur talar einnig fyrir því að standa vörð um heilsu borgarbúa með því að sporna gegn loftmengun, öflugri og ódýrari almenningssamgöngum og réttlátu leikskólakerfi. 

„Ég trúi einnig á samtakamátt og samvinnu félagshyggjufólks og því hugnast mér að vinstri öflin í borginni taki sig saman um sameiginlegan lista. Kjósendur eiga skilið að fá einn skýran og sameinaðan valkost til vinstri. Slíkt samstarf yrði í þágu réttláts og græns samfélags.“

Hann bindi vonir við að flokkar á vinstri vængnum velji að samstarf frekar en sundrung. 

Fréttin er í vinnslu.