Slys á Miklu­braut: Bíll hafnaði á vegriði

Lítið er vitað um slysið en útkallið barst slökkviliði og lögreglu á tólfta tímanum í kvöld og eftir klukkan eitt voru viðbraðgsaðilar enn á vettvangi.

Steinþór Darri Þorsteinsson, varðstjóri slökkviliðsins á höfuðborgarsvæðinu, sagði í samtali við Vísi rétt fyrir miðnætti að um alvarlegt slys væri að ræða en að öðru leyti kvaðst hann ekki vita meira um slysið.

Vettvangur slyssins á Miklubraut er fyrir neðan Rauðagerði og skammt vestur af umferðarslaufunni sem tengir Kringlumýrarbraut og Sæbraut. Lögregla lokaði fyrir nokkurra hundruða metra vegkafla á Miklubraut. 

Fjöldi bíla í slysinu liggur enn ekki fyrir en einn bíll virðist hafa hafnað með afturdekkin ofan á vegriði og framan á staur á umferðareyju sem skilur akreinarnar að. Mikið tjón er á ökutækinu.

Á annan tug slökkviliðs-, lögreglu- og sjúkrafluttningabíla eru á vettvangi en Steinþór varðstjóri segir að tveir dælubílar hafi verið kallaðir út og fjöldi sjúkraflutningabíla úr nágrenninu.

Þegar blaðamaður mætti á vettvang upp úr miðnætti hafði einhver fjöldi fólks, aðallega unglinga, safnast við slysstað til að fylgjast með aðgerðum úr fjarlægð. Lögreglumenn sáu til þess að vegfarendur kæmust ekki nálægt aðgerðasvæðinu og mótmæltu öllum myndatökum harðlega. Á vettvangi mátti sjá staka hálkubletti glitra á malbikinu. Laganna verðir voru einnig staðsettir víða um hverfið til að beina umferð fram hjá slysinu.

Fréttin hefur verið uppfærð.