Fé­lag Skorra Rafns að kaupa Val­höll

Þetta staðfesta bæði Skorri Rafn og Tryggvi Másson, framkvæmdastjóri Sjálfstæðisflokksins, í samtali við Vísi. Þeir vildu að svo stöddu ekki tjá sig frekar um málið.

Skipulagsfulltrúi útilokaði nýja hæð en ekki hótelrekstur

Þann 16. desember síðastliðinn tók skipulagsfulltrúi Reykjavíkur fyrirspurn Alva fasteigna um Valhöll til afgreiðslu. Alva fasteignir óskuðu eftir afstöðu skipulagsfulltrúa til þess hvort mögulegt væri að fá leyfi til að breyta notkun hússins í gistiheimili eða hótel, koma fyrir matsal í kjallara þess og að bæta við einni inndreginni hæð ofan á húsið.

Niðurstaða skipulagsfulltrúa var að taka neikvætt í fyrirspurn um hækkun hússins en að hótelstarfsemi á lóðinni samræmdist aðalskipulagi. Þó þyrfti að breyta deiliskipulagi til að breyta nýtingu byggingarinnar í hótel.

Byggð sérstaklega fyrir flokkinn

Valhöll var byggð sérstaklega undir starfsemi Sjálfstæðisflokksins árið 1975 en þar hefur ýmis önnur starfsemi einnig verið rekin. Í umsögn skipulagsfulltrúa segir að varðveislugildi Valhallar sé ótvírætt. Í ritinu Byggðakönnun: Borgarhluti 3 – Hlíðar: I. hluti: Saga byggðar í borgarhlutanum: Fornleifaskráning og varðveislumat fornleifa og yngri minja: Niðurstöður varðveislumats húsa og hverfisheilda segi eftirfarandi:

„Reist 1975 og hönnuð af arkitektunum Halldóri H. Jónssyni og Garðari Halldórssyni. Byggingin er merk fyrir þær sakir að hún er eina byggingin sem var sérhönnuð til að hýsa höfuðstöðvar stjórnmálaflokks og hefur ótvírætt verndargildi sem slík. Borgarsögusafn bendir á að byggingin var hönnuð til að setja svip á umhverfið. Enn fremur segir þar að „útlit hússins og staðsetning endurspeglar hlutverk þess. Hefur hátt varðveislugildi, einkum sem áberandi kennileiti á hornlóð og táknræn bygging. Þarf umhverfislegt andrými sem slíkt.“

Umsvifamikill athafnamaður

Skorri Rafn Rafnsson er stofnandi og forstjóri Alva capital, sem er móðurfélag Alva fasteigna. Hann hefur stofnað og leitt fjölda fyrirtækja, meðal annars Inkasso, Netgiro, Moberg, Heimkaup, Hópkaup og Bland, og gegnt bæði stöðum forstjóra og stjórnarformanns, að því er segir á vef Alva capital.

Hann hefur í gegnum tíðina einnig átt nefmiðla á borð við hun.is, sport.is og 433.is. Þá var hann einn af stofnendum smálánafyrirtækisins Hraðpeninga.

Í október síðastliðnum var greint frá því að félag hans Alva capital hefði samið við alþjóðlega hótelkeðju um rekstur hótels í húsnæði félagsins að Rauðarárstíg 27, þar sem utanríkisráðuneytið var áður til húsa.