Erlent

Banda­rískir her­menn í Nígeríu

Samúel Karl Ólason skrifar
Bandaríkjamenn eiga ekki að taka þátt í bardögum heldur þjálfa og aðstoða hermenn Nígeríu með öðrum hætti. Herinn stendur frammi gegn fjölmörgum ógnum víðsvegar um landið.
Bandaríkjamenn eiga ekki að taka þátt í bardögum heldur þjálfa og aðstoða hermenn Nígeríu með öðrum hætti. Herinn stendur frammi gegn fjölmörgum ógnum víðsvegar um landið. EPA/LEGNAN KOULA

Um hundrað bandarískir hermenn hafa verið sendir til Nígeríu, þar sem þeir munu þjálfa þarlenda hermenn og hjálpa þeim í átökum við uppreisnar-, víga- og glæpahópa. Þeim er ekki ætlað að taka þátt í átökum með hermönnunum sem þeir munu þjálfa.

BBC hefur eftir Samaila Uba, talsmanni varnarmálaráðuneytis Nígeríu, að samstarfið við Bandaríkjamenn muni hjálpa herafla ríkisins verulega í að berjast gegn þessum hópum. Hún muni sérstaklega hjálpa þegar kemur að sérstakri tækni og kunnáttu hermanna Nígeríu.

AP-fréttaveitan segir að yfirvöld í Nígeríu hafi beðið Bandaríkjamenn um aðstoð við þjálfun, tæknilegan stuðning og upplýsingaöflun. Er það í kjölfar þess að Donald Trump, forseti Bandaríkjanna, var harðorður í garð Nígeríumanna og sakaði þá um að verja ekki kristna íbúa gegn meintu þjóðarmorði.

Þeim ásökunum var hafnað og greinendur segja hana mikla einföldun á flókinni stöðu í Nígeríu. Vopnaðir menn, hvort sem þeir eru meðlimir glæpahópa, vígahópa eða uppreisnarhópa, ráðast reglulega á óbreytta borgara í Nígeríu, sama hverrar trúar þeir eru.

Bandaríkjamenn gerðu í desember árásir gegn vígamönnum Íslamska ríkisins í norðvesturhluta Nígeríu. Yfirvöld í Bandaríkjunum staðfestu svo í síðasta mánuði að smár hópur hermanna hefði verið sendur til Nígeríu.

Umræddir vígahópar eru gífurlega margir í Nígeríu og á stærra svæði í Afríku. Meðal þeirra hópa sem eru virkir á svæðinu eru Íslamska ríkið á Sahel-svæðinu, eða ISSP, Íslamska ríkið í Vestur-Afríku eða ISWAP, Jama’at Nusrat al-Islam wal-Muslimin eða JNIM, Boko Haram, svo einhverjir séu nefndir.

Sjá einnig: Vara við uppgangi Íslamska ríkisins

Við vígamenn bætast svo glæpamenn sem stunda það að ræna fólki fyrir lausnargjald og til að þvinga það til ólöglegrar námuvinnslu.

Nígería Bandaríkin Hernaður Hryðjuverkastarfsemi

Tengdar fréttir

Meina fólki frá fjölda ríkja að ferðast til Bandaríkjanna

Donald Trump, forseti Bandaríkjanna, fjölgaði í gær verulega þeim sem mega ekki ferðast til Bandaríkjanna, eða sæta takmörkunum á ferðalögum þangað. Hann bætti tuttugu ríkjum við á lista slíkra ríkja og eru þau nú orðin 39 en ríkisstjórn hans leggur mikið púður í það að draga úr fjölda innflytjenda í Bandaríkjunum, hvort sem þeir dvelja þar með ólöglegum hætti eða ekki.

Ná ekki að leika árangur Wagner eftir

Rúmum tveimur árum eftir dauða Jevgenís Prígósjín, rússnesks auðjöfurs og eiganda málaliðahópsins Wagner, hefur staða Rússa í Afríku versnað töluvert. Nýi málaliðahópur Rússa, Afríkudeildin, sem rekinn er af varnarmálaráðuneytinu hefur ekki skilað sama árangri og Wagner gerði á sínum tíma, hvorki með tilliti til hagnaðar eða áhrifa.

Mest lesið


Fleiri fréttir

Sjá meira


×

Mest lesið