Hellis­heiði er lokuð

Þetta kemur fram á vef Vegagerðarinnar. Hægt er að komast um Þrengslin en mikill skafrenningur er á svæðinu og vegfarendur eru beðnir að fara með gát.

Í samtali við fréttastofuna sagði Magnús Ragnarsson, aðalvarðstjóri á Suðurlandi, að öngþveiti hafi ríkt á svæðinu áðan vegna veðurs. Þar sé mjög slæmt veður, hálka, slabb og mikill vindur.

Nokkrir bílar hafi hafnað út af veginum og að minnst tveir bílar hafi lent saman. Ekki liggur fyrir hversu margir hafi verið í bílunum né hversu alvarlegt slysið var.

„Það voru að minnsta kosti tveir bílar sem rákust á. Ég er ekki alveg búinn að fá staðfest hvort þeir hafi verið fleiri en ég vil ekki útiloka það,“ segir Magnús.

Hann segir að það séu sjúkrabílar á vettvangi sem og slökkviliðsbílar sem sinna hreinsunarstarfi. Þetta sé veðurtengt líkt og margt annað sem hefur komið fyrir það sem af er degi.

Magnús sagði þó að hann hefði fengið þær upplýsingar af vettvangi að líklega væri einungis um minniháttar meiðsl að ræða. Hann gat ekki veitt frekari upplýsingar um líðan þeirra sem voru í bílunum.

Fréttin verður uppfærð.