Hag­kvæmt að ráða krabba­meins­sjúk­linga í vinnu

Eða hvað?

Því nýverið birti blaðamaður FastCompany grein undir fyrirsögninni 

„If you want to get something done, hire a cancer patient,“ eða 

„Ef þú vilt koma einhverju í verk, skaltu ráða krabbameinssjúkling.“

Tekið skal fram strax að umræddur blaðamaður, Jonathan Gluck, er sjálfur með krabbamein og hefur verið það í 22 ár.

Gluck birti greinina viljandi með fyrirsögn sem sjokkerar. 

En er samt svo sönn og það er það skemmtilega og jákvæða í sögunni.

Því Gluck er fyrir alvöru að mæla með fólki með krabbamein sem gott starfsfólk til framtíðar á vinnustöðum.

Og rökstyður það svo sannarlega!

Áður en lengra er haldið, er samt ágætt að útskýra að fyrirsögn Gluck er tilvísun í orðatiltæki sem er þekkt á ensku og er: „If you want to get something done, ask a working mother.“ Fyrirsögnin hans er því orðaleikur.

Þá skal líka tekið fram að í grein Gluck, tekur hann vel fram að fyrst og fremst þurfi hver og einn einstaklingur með krabbamein að meta það út frá sjálfum sér hvort viðkomandi vilji eða geti unnið. Hann er fyrst og fremst að miðla af sinni reynslu.

Var sagt að hann ætti 18 mánuði

Gluck er í dag einn af lykilmönnum ritstjórnar FastCompany en áður hefur hann starfað á miðlum eins og New York magazine, Vogue og Hearst Corporation.

Haustið 2003 greindist Gluck með æxli í mjöðm. Þá 38 ára, í draumstarfinu, giftur og nýorðinn faðir sjö mánaða dóttur.

Heimurinn hrundi.

Að minnsta kosti um hríð.

Því síðan þá hefur Gluck svo sannarlega lært að lifa með krabbameininu.

Þó var honum sagt í upphafi að hann ætti aðeins um 18 mánuði eftir ólifaða.

Nú eru þó liðin um 22 ár og á þeim tíma hefur Gluck farið í gegnum margvíslegar meðferðir og upplifað það oft að fara inn og út úr nokkurs konar sjúkdómshléi.

Þá segist hann ekki hafa tölu á því hversu oft hann hefur þurft innlögn á spítala en tegundin sem Gluck er með er mergæxli sem er meðhöndlanlegt en ekki læknanlegt.

Gluck valdi það þó að hætta ekki að vinna. Og segir líka að þrátt fyrir krabbameinsmeðhöndlunina alla saman hafi hann ekki þurft að taka fleiri frídaga en meðalmanneskja. Svona þegar á heildina er litið.

„Ég hef þurft að taka einstaka frídaga og stundum vinna heiman frá mér, frá læknastofu, meðferðarstöð eða sjúkrahúsi í stað skrifstofunnar. En með örfáum undantekningum hef ég mætt til vinnu eftir greiningu alveg eins og áður. Ég hef fengið stöðuhækkanir, unnið til verðlauna og jafnvel verið sagt upp – eins og margir aðrir. Fyrir utan vinnu skrifaði ég bók um lífið með sjúkdómnum,“ segir Gluck og vísar þar til bókarinnar An Exercise in Uncertainty sem kom út í fyrra.

Gluck segir fólk stundum tala um það við hann hversu hugrakkur hann sé að hafa haldið áfram að vinna þrátt fyrir krabbameinið.

Hann segir þá ákvörðun hins vegar ekkert hafa að gera með hugrekki. Heldur miklu frekar ótta.

„Að sitja heima og hugsa um myrkrið sem nálgast, eða halda sér uppteknum og beina huganum annað. Ég hef líka gaman af starfinu mínu, og ég á eiginkonu, tvö börn og húsnæðislán. Ég hef einfaldlega ekki efni á að vinna ekki.“

Á þeim rúmum tuttugu árum sem liðin eru frá því að Gluck greindist með krabbamein, segist hann hafa lært það að það sem hann í upphafi leit á sem mikla byrði endaði með að verða hans mesti og besti styrkur í starfi.

Því svo margt einkennir hann sem starfsmann, sem hann telur almennt eiga við um fólk sem greinist með krabbamein, kemst í gegnum það eða lærir að lifa með því.

Jákvæði listinn

Í grein Gluck kemur fram að árið 2025 sé áætlað að um 18,6 milljónir manna í Bandaríkjunum hafi lifað af krabbamein. Þá er vitnað í rannsókn sem tímaritið Cancer birti þar sem fram kemur að um 60% sjúklinga á aldrinum 25-62 ára halda áfram að vinna meðan á meðferð stendur.

Gluck er í raun ekki aðeins að benda á hversu hratt stækkandi sá hópur fer á vinnumarkaði sem er með krabbamein, velur að vinna áfram og lærir að lifa með krabbameini, heldur segir hann krabbameinið einfaldlega lífsreynslu sem geri fólk að mjög verðmætum starfsmönnum. Sem Gluck rökstyður svona:

Við höfum þrautseigju

Sem Gluck segir meðal annars eflast vegna þess að fólk með krabbamein þarf að standa í mörgum meðferðum, lyfjum, geislum, aðgerðum og fleira. Takast á við aukaverkanir eins og ógleði, niðurgang, þreytu, heilamóðu, beinverki, dofa og fleira.

Um þrautseigjuna segir Gluck:

„Í vinnu þýðir það að fá verkefni eru of stór eða ógnvekjandi fyrir mig. Ég klára það sem ég byrja á, jafnvel þegar hlutirnir fara úrskeiðis. Og ef ég er beðinn um að gera eitthvað, jafnvel utan þægindarammans, þá er ég yfirleitt tilbúinn. Ég er einfaldlega þakklátur fyrir að fá tækifærið.“

Við erum róleg undir álagi

Að venjast því að fá erfiðar fréttir er fylgifiskur þess að lifa með krabbamein. Í tilfelli Glucks: Að krabbameinið sé komið aftur.

Þetta segir Gluck skila því að hann panikkar ekki þótt upp komi erfiðar eða óvæntar aðstæður í vinnunni.

Við getum unnið úr flóknum upplýsingum

Gluck bendir á að krabbamein sé flókinn sjúkdómur. Fólk sem greinist þurfi að læra heilmikið um sjúkdóminn sinn, læknisfræðileg hugtök, taka mikilvægar ákvarðanir og fleira.

Allt séu þetta liðir í því að efla þá hæfni fólks að vinna úr flóknum upplýsingum og taka upplýstar ákvarðanir.

Við kunnum að stýra flóknum teymum

Í kringum hvern og einn krabbameinssjúkling er teymi sérfræðinga og annarra aðila sem koma að málum með einum eða öðrum hætti, oft á ólíkum tímum, á ólíkan hátt og svo framvegis.

Gluck segir þennan hluta sjúkdómsins í raun gera hvern og einn krabbameinssjúkling að meistara í verkefnastjórnun.

Við erum hafsjór af samkennd

Samkennd er einn mest áberandi eða sterkasti eiginleikinn sem Gluck segir eflast hjá fólki með krabbamein. Sem almennt lærir að verða næmari fyrir vanda annarra, þolinmóðari og skilningsríkari.

Almennt er talað um að eftirsóttasta starfsfólk framtíðarinnar verði fólk með sterka tilfinningagreind. Sem Gluck segir að einkenni fólk með krabbamein. Samkennd segir hann til dæmis auka sköpun, framleiðni og hagnað og af samkennd eigi krabbameinssjúklingar mikið meira en nóg!

Við erum bjartsýn

Bjartsýni hefur jákvæð áhrif á árangur í starfi. Bjartsýnir starfsmenn eru afkastameiri, ná betri árangri og haldast lengur í starfi. Um þetta hefur verið margrætt og ritað.

Gluck segir að fólk sem lifi af krabbamein sé í raun fólk sem sé í stöðugri baráttu gegn líkindum. Þar sem vitað er að fólk sem virkilega trúir á sinn bata er líklegra til að ná honum. Bjartsýni sé að þessu leyti eitt þeirra sterkasta vopn.