Óttast hraða Vals mest en býst við frá­bæru ein­vígi

Fulltrúar félaganna ræddu við fjölmiðla fyrir utan Olís-stöðina við Álfheima í gær, enda um sannkallaðan hápunkt Olís-deildarinnar að ræða og má búast við mikilli stemningu þegar þessir tveir risar mætast.

„Maður er mjög spenntur. Það er helvíti gaman að fá að spila svona einvígi, gegn góðu liði Vals. Við erum líka góðir og þetta verður ekkert nema mjög gaman,“ sagði Ágúst í viðtali við Val Pál Eiríksson sem sjá má hér að neðan.

FH-ingar ættu að vera fullir sjálfstrausts eftir að hafa slegið út erkifjendur sína í Haukum í undanúrslitum, 3-1.

„Við erum það. Haukar eru líka mjög gott lið og svona nágrannaslag fylgir geggjuð stemning. Mjög gaman að vinna þá. Aftur á móti mætum við núna öðruvísi andstæðingum. Þeir eru líka mjög góðir en við erum mjög spenntir og ákveðnir í að vinna þetta,“ sagði Ágúst sem er ekki í vafa um hvað helst beri að varast hjá Val:

„Hraðann. Þeir eru fljótir,“ sagði Ágúst en lætur þó engan bilbug á sér finna.

„Þeir eru með mjög fljóta menn, fljótir upp, með góða sóknarmenn. Vörnin okkar er mjög góð, markvarslan mjög góð, og á sama tíma erum við með frábæra leikmenn í sókninni líka. Unga og geggjaða. Þetta verða 50:50 leikir og erfitt að segja.“