Segjast hafa skotið á banda­rískt her­skip

Fars-fréttaveitan í Íran, sem hefur tengingar við íranska byltingarvörðinn, sagði frá því í morgun að stjórnendur bandarískrar freigátu hefðu ekki orðið við skipunum byltingarvarðarins og því hafi tveimur eldflaugum verið skotið að herskipinu nærri borginni Jask, sem er vestur af Hormússundi.

Þessar eldflaugar eru sagðar hafa hæft skipið og á því að hafa verið snúið við aftur.

Í frétt Fars segir að leiðtogar byltingarvarðarins hafi ítrekað lýst því yfir að engu skipi verði siglt gegnum sundið, án leyfis þeirra.

Blaðamaður Axios hefur eftir háttsettum bandarískum embættismanni að ekkert herskip hafi orðið fyrir írönskum eldflaugum. Svarið snýr þó ekki að því hvort eldflaugum hafi verið skotið að bandarísku herskipi á svæðinu.

Yfirstjórn herafla Bandaríkjanna í Mið-Austurlöndum hefur gefið út tilkynningu um að ekkert skip hafi orðið fyrir eldflaugum frá Íran. Þeir segja herskip á svæðinu notuð til að halda Íran í hverkví og til að aðstoða við opnun Hormússunds.

Þeir segja ekki til um hvort eldflaugum hafi verið skotið að herskipi eða ekki.

Reuters hefur eftir írönskum embættismanni að „viðvörunarskotum“ hafi verið skotið að bandarísku herskipi. Það hafi verið gert til að koma í veg fyrir að því yrði siglt inn á Hormússund.

Vilja opna sundið

Vopnahlé er í gildi milli Bandaríkjamanna og Írana en Hormússundi hefur verið lokað fyrir siglingar nærri allra skipa frá því Bandaríkjamenn og Ísraelar hófu árásir á Íran fyrir rúmum tveimur mánuðum síðan.

Um fimmtungur allrar olíu heimsins fer þar um, við hefðbundnar kringumstæður, og hefur lokunin haft mikil áhrif á hagkerfi víða um heim.

Donald Trump, forseti Bandaríkjanna, tilkynnti í nótt að til stæði að „leiðbeina“ skipum sem setið hafa föst um Hormússund þar í gegn. Hvernig það á að gerast sagði hann þó ekki.

Í kjölfarið vöruðu ráðamenn í Íran við því að þeir myndu túlka öll afskipti Bandaríkjamanna á sundinu sem brot gegn vopnahléinu sem nú er í gildi.

CENTCOM segir að tveimur bandarískum flutningaskipum hafi verið siglt gegnum sundið í morgun. Það hafi verið gert eftir að bandarískum herskipum hafi verið siglt gegnum sundið.

Eitt skip, frá Sameinuðu arabísku furstadæmunum, varð fyrir að minnsta kosti tveimur drónum í morgun.

Fréttin hefur verið uppfærð. Síðast klukkan 12:20.