Fékk tveggja högga refsingu fyrir reiðiskast á US Open

Niemann sló tvo bolta út fyrir vallarmörk á sjöttu holu, sem er par-4 hola, en það var fimmtánda hola hans á hringnum á fimmtudag. Þetta gerðist skömmu áður en leikur á fyrsta hring Opna bandaríska meistaramótsins var stöðvaður vegna myrkurs á Shinnecock Hills golfvellinum.

Ástandið átti aðeins eftir að versna fyrir fyrirliðann í LIV-golfdeildinni þegar leikur hófst að nýju á föstudagsmorgun. Niemann þurfti að byrja daginn snemma eins og okkar maður Gunnlaugur Árni Sveinsson.

Niemann endaði á að fá fimmfaldan skolla, eða níu högg, á holunni en því var síðar breytt í ellefu högg, eða sjö yfir pari, eftir að Golfsamband Bandaríkjanna veitti honum tveggja högga víti fyrir að kasta kylfu á holunni.

Hinn 27 ára gamli Niemann lauk fyrsta hringnum á 78 höggum, eða átta yfir pari. Hann var þegar kominn aftur út á völlinn að spila annan hringinn þegar tilkynnt var um vítið. ESPN segir frá.

Niemann kastaði kylfunni sinni eftir að innáhögg hans – sjötta högg hans á holunni – lenti of stutt frá flötinni þegar hann reyndi að ljúka leik á fimmtudagskvöld.

Sjálfboðaliði á Opna bandaríska meistaramótinu sem varð vitni að atvikinu sagði The Athletic að Niemann hefði beðið dómara frá USGA um lausn frá eldmaurum nálægt boltanum sínum. Þegar Niemann var neitað um það sparkaði hann í fána sem hafði verið notaður til að merkja boltann í háu náttúrulegu grasi og kastaði kylfunni sinni að minnsta kosti fimmtíu metra.

USGA sagði að athæfi Niemanns hefði verið metið sem „alvarleg misferli“ samkvæmt reglu 1.2b í golfreglunum, sem kveður á um að „búist er við að leikmenn spili í anda leiksins með því að sýna heilindi, tillitssemi við aðra og hirða vel um völlinn.“

Reglan heimilar mótsnefndum að „setja og framfylgja sérstökum stöðlum um hegðun leikmanna á vellinum og beita refsingum sem geta verið allt frá einu höggi til algjörrar útilokunar, allt eftir alvarleika misferlisins.“

Niemann, sem er í 80. sæti á opinberum heimslista karla í golfi, er fyrsti kylfingurinn sem er refsað samkvæmt siðareglum á risamóti á þessu tímabili.

Í apríl fékk Sergio García viðvörun vegna brots á siðareglum, sem var í fyrsta sinn á Masters-mótinu, þegar hann braut dræverinn sinn á kæliboxi í reiðikasti á annarri holu á lokahringnum á Augusta National.