Sjáðu Ollu kveðja með stæl, dramatík í Eyjum og Fram skjóta Valskonur á kaf

Blikar nýttu sér að FH-konur töpuðu stigum í Vestmannaeyjum og náðu þeim á stigum á toppnum en Hafnfirðingar halda toppsætinu á markatölu.

Ólöf Sigríður Kristinsdóttir, eða Olla eins og flestir þekkja hana, spilaði sinn síðasta leik fyrir Breiðablik í sumar og skoraði bæði mörkin í 2-0 sigri á Þór/KA. Olla er á leið út í nám í Harvard-háskólanum.

Hinar ungu Hrönn Haraldsdóttir og Ingibjörg Magnúsdóttir komu toppliði FH í 2-0 í Eyjum en Eyjakonur komu til baka og tryggðu sér 2-2 jafntefli með tveimur mörkum á síðasta hálftímanum. Annað var sjálfsmark FH en jöfnunarmarkið skoraði Allison Grace Lowrey.

Framkonur fóru á kostum á móti botnliði Vals og unnu 4-1 sigur. Þetta var fjórði deildarsigur Framliðsins í röð sem hefur heldur betur sagt skilið við fallbaráttuna. Sara Svanhildur Jóhannsdóttir, Alda Ólafsdóttir, Katrín S. Vilhjálmsdóttir og Taylor Marie Hamlett skoruðu mörk Fram en Margrét Brynja Kristinsdóttir jafnaði metin í 1-1.

Mörkin úr þessum þremur leikjum má sjá hér fyrir ofan og neðan.