Guð­mundur Felix kominn með krabba­mein

„Það er búið að taka sýni úr því og þetta er svolítið aggressívt. Ég er búinn að fara í segulómtæki sem sýndi að þetta væri bara staðbundið, komið að beininu og brjóskinu en ekki í gegnum það.

Þannig að þeir gera ráð fyrir að taka af nefið og sentímeter umfram svo það er nefið og aðeins af vörinni,“ segir hann í samtali við Vísi. Ekki séu vísbendingar um að krabbameinið hafi dreift sér um líkamann en hann eigi eftir að fara í jáeindaskanna til að staðfesta þessa tilgátu læknanna.

„Eins og þetta lítur út núna virðist vera merki um að með því muni þeir ná þessu alveg í burtu. Ég verð aðeins ófrýnilegri en verð allavega á lífi.“

Berst við þetta eins og hvert annað

Guðmundur hefur vakið athygli fyrir það hvernig hann tókst á við það að missa handleggi sína í slysi árið 1998 en hann hefur öðlast nýtt líf eftir að handleggir voru græddir á hann í tímamótalæknisaðgerð.

Hann segist í samtali við Vísi hafa verið á góðu róli að undanförnu, hafa stofnað fyrirtæki og þetta setji mögulega strik í reikninginn. Þrátt fyrir það er hann jákvæður og hyggst takast á við þetta eins og aðrar áskoranir í sínu lífi.

„Þetta er bara það sem það er. Það eru það margir í mínu lífi sem mér þykir vænt um að það er bara ekkert í boði að vera eitthvað að gefast upp. Maður berst við þetta eins og hvað annað.“

Búði sig undir það versta

„Ég var búinn að vera að bíða eftir niðurstöðum og sagt að þetta væri mjög líklega krabbi þannig að maður náttúrulega átti von á öllu því versta. Að þetta væri komið inn í heilann og alls staðar, þannig að það var svona smá léttir að þeir telja sig geta náð því.“

Þrátt fyrir það taki þetta eðlilega svolítið á.

„Ég er búinn að vera útlimlaus í 23 ár, með hendur í fimm ár og nú þarf að fara að skera meira af mér. Þetta er ekki besti staðurinn til þess að láta skera eitthvað af sér, beint framan í andlitinu. Þannig að þetta eru svona blendnar tilfinningar.“

„Ég mun fá einhver svona gervinef sem maður smellir á. Ég veit svo sem ekki hversu vel það mun líta út en maður verður allavega ekki gangandi um með holurnar í andlitinu.“

Honum hafi verið bent á að leita til einhverra fremstu andlitsskurðlækna í heimi sem muni meta stöðuna og hvort hægt sé að fjarlægja krabbameinið með minna áberandi hætti.

Teymið sem hann hitti næsta mánudag hafi tekið þátt í fyrstu andlitsíágræðslunni og sé sérhæft í míkróskurðlækningum til að endurbyggja andlit.

Þú hefur gengið í gegnum mikið fram að þessu og ert kannski hálfgert læknisfræðilegt kraftaverk. Ertu jákvæðari í ljósi þessa eða hvernig sérðu þetta?

„Jájá, ég er öllu vanur orðinn einhvern veginn en ég var að vonast til þess að geta verið laus við aðgerðir þetta árið. Ég fór í fjórar í fyrra, missti 10 kíló og það er bara erfitt að vera alltaf í þessum aðgerðum. En ég meina, þetta er bara það sem það er og ég hef séð það svartara.“

Fréttin er í vinnslu og von er á ítarlegra viðtali við Guðmund.