Dagskráin í dag: Perlur úr íslenskum fótbolta, úrslitaeinvígi í handbolta og golfvísindin

Beinum útsendingu frá íþróttaviðburðum hefur snarfækkað vegna útbreiðslu kórónuveirunnar eins og gefur að skilja. Til að mæta því hafa Stöð 2 Sport og hliðarrásir verið dagskrársettar með nýju dagskrárefni og endursýningum af safnefni til að stytta íþróttaþyrstum stundirnar.

Á Stöð 2 Sport eru á dagskránni margar af perlum íslenskra fótboltasumra, allt frá árinu 1997 til síðasta árs, og ljóst að þar verður hægt að rifja upp magnaðar rimmur. Lista yfir leikina má finna hér.

Stöð 2 Sport 2

Handboltinn verður í fyrirrúmi á Stöð 2 Sport 2 þar sem sjónum verður beint að úrslitaeinvígum karla og kvenna árið 2018. ÍBV og FH mættust í karlaflokki en Valur og Fram í kvennaflokki.

Stöð 2 Sport 3

Á Stöð 2 Sport 3 verða sýndir bikarúrslitaleikir í fótbolta karla og kvenna, þar á meðal úrslitaleikur FH og Víkings R. í karlaflokki á síðasta ári.

Stöð 2 eSport

Á rafíþróttastöðinni, Stöð 2 eSport, verða útsendingar frá úrslitum síðasta tímabils á Íslandi í Counter-Strike auk þess sem sýnt verður frá fyrstu landsleikjum Íslands í raffótbolta, þar sem keppt var í Pro Evolution Soccer.

Stöð 2 Golf

Á Stöð 2 Golf verða sýndir athyglisverðir þættir fyrir kylfinga sem vilja afla sér meiri þekkingar fyrir golfsumarið, en þeir heita The Science of Golf. Þar verður einnig sýnt frá Ryder-bikarnum 2008, Einvíginu á Nesinu árin 2006-2009 og Royal Trophy 2013 þar sem úrvalslið Evrópu og Asíu áttust við.

Allar útsendingar dagsins má finna á heimasíðu Stöðvar 2.