Demókratar flúðu Texas aftur

Án þess að hafa þingmenn Demókrataflokksins í þingsal geta Repúblikanar ekki samþykkt lagafrumvörp sín. Fyrsta markmið þessara þingmanna er að koma í veg fyrir samþykkt frumvarpa og hitt er að vekja athygli á viðleitni Repúblikana til að breyta kosningalögum sér í hag.

Þingmennirnir eru nú staddir í Washington DC þar sem þeir hafa hvatt þingmenn þar til að leggja meira kapp í að verja kosningarétt Bandaríkjamanna, eins og fram kemur í frétt AP fréttaveitunnar.

Einn þeirra sagði blaðamönnum í dag að þeir væru ekki að flýja fyrir Demókrata. Þeir væru að gera þetta fyrir alla í Texas. Alla þá sem vilji nýta kosningarétt sinn.

Repúblikanar víðsvegar um Bandaríkin hafa unnið markvisst að því að gera fólki sem þykir líklegra til að kjósa Demókrata erfiðara að kjósa og hafa aðgerðir þeirra að miklu leyti beinst að þeldökku fólki. Þetta hafa þeir gert á grunni innihaldslausra ásakana Donalds Trump og bandmanna hans um að umfangsmikið kosningasvindl hafi átt sér stað í forsetakosningunum í fyrra.

Trump hefur ítrekað haldið því ranglega fram að hann hafi unnið kosningarnar en ekki Joe Biden.

Frumvarpið sem repúblikanar í Texas ætluðu sér að samþykkja í gærkvöldi er sagt ganga enn lengra en þau sem hafa orðið að lögum í ríkjum eins og Georgíu og Flórída nýlega. Það myndi meðal annars stytta opnunartíma kjörstaða, gera fólki erfiðara fyrir að kjósa með póstatkvæði og gefa eftirlitsmönnum flokkanna á kjörstöðum aukin áhrif. Kosningalögin í Texas voru fyrir ein þau ströngustu í Bandaríkjunum.

Þessi sami hópur þingmanna flúði einnig þinghúsið í maí og þá með sama markmiði.

Demókratar flúðu einnig frá Texas árið 2003, þegar 50 þingmenn flúðu til Oklahoma. Þá vildu þeir koma í veg fyrir að Repúblikanar gerðu breytingar á kjördæmum Texas sér í hag. Það heppnaðist ekki og AP fréttaveitan segir breytingarnar hafa kostað Demókrata fimm þingsæti í fulltrúadeild Bandaríkjaþings.

Þingmenn Repúblikanaflokksins í Oregon flúðu ríkið árið 2019 til að koma í veg fyrir samþykkt frumvarps um baráttu gegn veðurfarsbreytingar af mannavöldum. Við það má bæta að sumrinu í Oregon hefur verið lýst sem helvíti. Þar loga miklir skógareldar og tugir eru taldir hafa dáið vegna minnst tveggja hitabylgna sem gengið hafa yfir svæðið.

Flótti þingmanna til að koma í veg fyrir samþykkt umdeildra frumvarpa virkar sjaldan sem aldrei, samkvæmt samantekt AP. Hann virðist þó hafa virkað í Oregon árið 2019 en þá drógu Demókratar frumvarp sitt til baka.

Greg Abbott, ríkisstjóri Texas, kallaði þingmenn aftur í þingsal í síðustu viku og þessi sérstaki þingfundur á að standa yfir í mánuð. Það gæti því reynst Demókrötum erfitt að halda mótmæli sín út. Abbott hefur hótað því að boða til nýs þingfundar verði frumvarpið ekki samþykkt á þessum og svo aftur og aftur.

Hann hefur sömuleiðis hótað því að láta handtaka þingmennina þegar þeir snúa aftur til Texas.

Reglur ríkisþinga Bandaríkjanna segja oft að lögreglan geti sótt þingmenn og þvingað þá til að sitja þingfundi. Í Texas þarf til að mynda einungis atkvæði meirihluta þeirra þingmanna sem eru á þingfundi til að senda lögregluna til að sækja þingmenn.

Joe Biden, forseti, ætlar að leggja meiri áherslu á vernd kosningaréttarins á næstunni, eftir þrýsting frá öðrum Demókrötum. Fulltrúadeild Bandaríkjaþings, þar sem Demókratar eru í meirihluta, hefur samþykkt frumvarp sem ætlað er að gera það og koma á margs konar breytingum á kosningum í Bandaríkjunum.

Það frumvarp mun þó aldrei fara í gegnum öldungadeildina, þar sem Demókratar eru með nauman meirihluta (51-50 með atkvæði varaforseta). Það er vegna reglu sem kallast filibuster á ensku. Á íslensku kallast hún einfaldlega reglan um aukinn meirihluta.

Biden mun hefja þessa viðleitni sína í Philadelphia í dag þar sem hann mun halda ræðu. Í ræðunni mun Biden fara yfir af hverju það sé rangt að neita fólki að taka þátt í kosningum og ítreka að hann muni berjast fyrir kosningarétti fólks, þrátt fyrir bylgju lagafrumvarpa sem ætlað sé að gera fólki erfiðara að kjósa.

Minnst tveir öldungadeildarþingmenn Demókrataflokksins hafa lýst sig andsnúna því að fella niður regluna um aukinn meirihluta og því er ekki útlit fyrir að Demókratar geti komið nokkru frumvarpi í gegnum öldungadeildina án aðkomu Repbúlikana.