Fingurinn bjargaðist rétt í tæka tíð

Dóra Júlía Agnarsdóttir skrifar 22. ágúst 2022 12:30

Víkingur Heiðar Ólafsson lenti í fingraveseni rétt fyrir tónleika sína um helgina. Owen Fiene

Píanósnillingurinn Víkingur Heiðar Ólafsson lenti í smá hryllingssögu að eigin sögn þegar hann vaknaði með slæma sýkingu í vísifingri og framundan voru tvennir tónleikar um kvöldið. Blessunarlega fór betur en á horfðist en hann deildi þessu á Instagram síðu sinni.

Víkingur var mættur til Þýskalands til að spila Grieg's concerto á tónlistarhátíð í Bremen en fólkið á bak við hátíðina reyndist honum vel. Fljótlega var honum komið til læknis sem útvegaði honum lyf til að laga sýkinguna. Læknirinn, sem var svo sannarlega til staðar fyrir Víking, átti svo miða á tónleika hans um kvöldið og mætti fyrst á búningaæfinguna til öryggis, ef ske kynni að Víkingur þyrfti á henni að halda.

Vísifingur Víkings var í slæmu ástandi þegar hann vaknaði.Instagram Story @vikingurolafsson

Stuttu síðar deildi Víkingur batanum á Instagram sögu sinni þar sem sýkingin virðist hafa gengið niður rétt fyrir fyrstu tónleikana. Þar skrifaði Víkingur:

„Bæting! Þetta var rétt fyrir fyrstu tónleikana. Guði sé lof fyrir lyf. Ég fann ennþá svolítið til en náði að komast í gegnum báða tónleika. Og tónleikarnir gengu mjög vel, þrátt fyrir allt.“

Rétt fyrir tónleikana hafði sýkingin blessunarlega gengið vel til baka.Instagram Story @vikingurolafsson

Blómvöndur fyrir lækninn

Rúsínan í pylsuendanum var svo þegar Víkingur gaf lækninum blómvöndinn sem hann fékk að loknum tónleikum.

„Ég gaf lækninum blómvöndinn, auðvitað. Hversu frábær manneskja. Hún keyrði meira að segja á hótelið til mín með sérstakt smyrsli þegar ég var að fara klukkan hálf sjö í morgun,“ skrifaði Víkingur að lokum.