Meira en þrjá­tíu ár síðan FH tókst síðast að slá ÍBV út úr úr­slita­keppninni

Það er búið að bíða svolítið eftir að undanúrslitin hefjist enda kláruðust átta liða úrslitin fyrir fimmtán dögum síðan. Landsleikjahlé og fjögur sóp í átta liða úrslitunum sáu til þess. Nú byrjar fjörið á ný og það er von á spennandi leikjum.

Leikur FH og ÍBV hefst klukkan 19.00 og er sýndur beint á Stöð 2 Sport. Upphitun fyrir leikinn hefst klukkan 18.30.

FH endaði einu sæti og einu stigi ofar en ÍBV í deildarkeppninni. FH-ingar unnu báða leiki liðanna í deildinni þar af seinni leikinn með þriggja marka mun í Kaplakrika í byrjun mars.

Vinna þarf þrjá leiki til að tryggja sér sæti í úrslitaeinvíginu á móti annað hvort Haukum eða Aftureldingu. Einvígi þeirra hefst á morgun.

Þetta er í fimmta sinn sem FH og ÍBV mætast í úrslitakeppninni og það er óhætt að segja að úrslitin hafi verið einhliða undanfarin ár.

Eyjamenn hafa sent FH-inga þrisvar sinnum í sumarfrí á undanförnum fimm árum. Það þarf að fara 31 ár aftur í tímann til að finna einvígi þar sem FH hafði betur á móti ÍBV.

FH vann 2-1 í undanúrslitaeinvígi á móti ÍBV vorið 1992 en FH-ingar fóru þá alla leið og urðu Íslandsmeistarar.

ÍBV vann FH í átta liða úrslitunum 2021 og hafði þá betur á dramatískan hátt. Út af kórónuveirufaraldrinum þá voru aðeins spilaðir tveir leikir og þeir enduðu báðir með jafntefli. ÍBV komst áfram á fleiri mörkum á útivelli.

ÍBV vann 2-0 sigur á FH í átta liða úrslitunum 2019 en FH var þá með heimavallarréttinn.

ÍBV tryggði sér síðan Íslandsmeistaratitilinn 2018 eftir 3-1 sigur á FH í úrslitaeinvíginu.

Félögin mættust ekki í úrslitakeppninni frá 1993 til 2017.